Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Син ми е прво одделение, за учење има интерес, не му е тешко и пишува домашни. Проблемот е во тоа што на училиште сака да седи само со машките деца, со девојчињата не сака и дури ако го премести учителката, плаче, вели дека не ги познава и дека му е срам. Дополнително, проблем е што се само 3 машки деца во класот и случајно ако не се дојдени во школо, сака да си оди и плаче. Пробав неколку варијанти да го опуштам и да го разубедам, но не ми успева. Инаку, има другарки и се дружел со нив, малку време одеше и во градинка. Ве молам за совет.

ОДГОВОР: Тргнувањето во прво одделение претставува нов простор и нов начин на тестирање на социјалните и когнитивните вештини на секое дете. Вашето дете одлично се справува во делот на совладување на академските вештини, но како што ни пишавте, во однос на конекцијата со девојчињата во класот покажува отпор и негодување, односно за дружење ги бара само момчињата со кои се чувствува комотно и комфорно.

Тоа е во ред додека трае неговиот процес на адаптација во новата средина. Со оглед на тоа што не посетувал, односно малку посетувал предучилиштна установа, а и немаме податоци за тоа дали е единствено дете во семејството и каква е семејната динамика по однос на социјалните врски со поширокото семејство, во ред е ако таа непријатност трае додека трае и адаптацијата. Доколку продолжи истиот начин на размислување и однесување, советувајте се со детски психолог каде што на индивидуална средба би се утврдиле сите причини кои во моментов не може да се адресираат.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.