Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Jас сум мајка на близнаци на возраст од 2 години и 8 месеци. Вербалните вештини на девојчето се на многу високо ниво, додека момчето сѐ уште не зборува. Од пред една година посетува дефектолог поради тоа што не се вртеше по име. Му имаме направено секакви анализи, дефектолошки, невролошки, ЕЕГ, психолошки и досега со сигурност ни кажале дека детето нема аутизам. Но сепак немаше посaкувана реакција за неговата возраст, последно е дијагностицирано SPD (sensory processing disorder), односно според моето истражување, хипосензитивност, (sensory under responsivity).

Ме интересира како се добива тој синдром, дали ние како родители нешто погрешивме во неговиот развој? Како да му помогнеме? Дали е ова нешто со кое ќе живее или може да се излекува? Како ќе биде во иднина кога ќе тргне во училиште? Кога се очекува да прозбори во оваа ситуација?
Тој е многу паметно момче и се интересира како функционираат работите, сака да се гали, но најголем дел од времето е како исклучен.

ОДГОВОР: Најнапред ви честитам за досегашното трпение и заложби со цел да ги разоткриете развојните отстапувања што ги покажало вашето дете, кои особено дошле до израз бидејќи тој е близнак и лесно може да направите споредба во развојните постигнувања.
СПД (SPD – sensory processing disorder) е нарушување на сензорната обработка, т.е. состојба која влијае врз тоа како мозокот ги обработува сензорните информации (стимули) кои доаѓаат од надворешниот и од внатрешниот свет.

Сетилните информации вклучуваат работи што детето ги гледа, слуша, мириса, вкусува или допира. СПД може да влијае врз сите сетила, или само на едно, и може да се разгледува како посебно развојно отстапување или како симптом или карактеристика на некој од спектарот на аутизам. Таквата процена би можел да ја утврди детски невропсихијатар и невропсихолог по направени ЕЕГ и МНГ.

Неколку карактеристики на СПД се: лоша рамнотежа, детето се плаши да игра на лулашки и тобогани, реагира слабо и бавно на ненадејни движења, допири, гласни звуци или силни светла, може да има проблеми со однесувањето. Понекогаш овие симптоми се поврзани и со слаби моторни вештини, на пример, да држи молив или ножици, качување по скали или да има низок мускулен тонус, како и доцнење на говорот.

Со помош на дефектолошки тренинг, секое развојно доживување и искуство ќе се интегрира доколку истото се повтори 100 до 200 пати, со што во оваа развојна проблематика е потребно многу трпение и време, што секако дека еден ден ќе се исплати. Вклучете го во терапија на сензорна интеграција со користење сензорна соба. Вашиот залог и ангажман е голем, останете такви какви што сте, охрабрувачки, стимулирачки, мотивирачки насочени. Тој расте во стимулирачка семејна средина во која има од кого да учи.

Одговара: Христина Стефановска, психолог за деца и адолесценти, Здружение „Хармоничен свет”

е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.