Дали е можно родителите да имаат омилено дете? Според новото истражување на Американската психолошка асоцијација, одговорот е „да“, а најчесто тоа е совесното дете.

Иако повеќето родители тврдат дека ги сакаат сите деца еднакво, науката сугерира дека често постои суптилна пристрасност. Меѓутоа, таквото фаворизирање може да има и позитивни и негативни последици врз семејната динамика.

Студијата, која ги анализирала податоците од 19.469 учесници од 30 анкети, покажала дека родителите имаат тенденција да го фаворизираат детето кое е посовесно и поодговорно. Таквите деца често оставаат впечаток дека се полесни за управување и созревање, што ги прави природен избор за родителска наклонетост. Родителите ја покажуваат својата наклонетост на различни начини – од начинот на кој комуницираат до количината на внимание и финансиска поддршка, па и до нивото на контрола што го вршат.

Сепак, интересно е што во САД, екстровертната личност, иако општо ценета во општеството, не игра голема улога во одредувањето на „омиленото дете“.

Влијание врз помалку фаворизираните деца

Додека омиленото дете може да ужива поголема поддршка и внимание, истражувачите предупредуваат на последиците што овој третман може да ги има врз другите деца. Обесправените деца често имаат полошо ментално здравје, чувство на инфериорност и затегнати семејни односи.

-Разбирањето на оваа динамика е клучно за идентификување на потенцијално штетните семејни обрасци. Важно е сите деца да ги почувствуваат љубовта и поддршката од своите родители – вели авторот на студијата, Александар Џенсен.

Дури и познатите личности признаваат дека имаат „омилено дете“. Крис Џенер еднаш изјавила дека нејзината најмлада ќерка Кајли ѝ е особено драга. Актерката Џејми Пресли признала дека нејзиниот најстар син ѝ е миленик од трите сина, додека Стив Карел шармантно признал дека има свој омилен, но мудро избегнал да открие кој е тоа.

Како да се избегне фаворизирањето?

Експертите ги советуваат родителите да станат свесни за нивната интеракција со секое дете. Правичниот и еднаков третман, без оглед на личноста или одговорностите на децата, може да помогне да се зачуваат хармонични семејни односи.

-Следниот пат кога ќе се запрашате дали вашиот брат или сестра е омиленото дете, запомнете дека тоа е покомплексно од обична претпочитаност за најстарото или најмладото дете. Можеби се работи за одговорност, темперамент или колку е лесно или тешко детето да се воспитува – заклучува Џенсен.

Извор