Односот помеѓу таткото и ќерката е навистина посебен. Нивните разговори, како и моделот на однесување на таткото, се исклучително важни за девојките да пораснат во ментално здрави жени. Иако во практиката, за жал, често се случува татковците да бидат помалку вклучени во образованието отколку мајките, тоа не треба да биде така бидејќи улогата на двајцата родители е еднакво важна за секое дете. Затоа, добро би било секоја ќерка да ги слушне следните пет реченици од нејзиниот татко.
- Те сакам
Иако родителите често мислат дека детето знае дека е сакано, тоа не значи дека не треба да му го повторуваат тоа. Експертите предупредуваат дека емоциите не треба да се земаат здраво за готово, особено кога станува збор за деца кои не можат од вашите постапки да сфатат колку ги сакате.
Животот нема секогаш да биде лесен и затоа вашите ќерки имаат потреба често да ги слушаат зборовите „те сакам“, не само од мајката, туку и од таткото. Татковците треба да им го кажат ова на девојчињата, бидејќи така стануваат свесни како мажите треба да се однесуваат со нив во зрелоста. Сите девојки треба да знаат дека се сакани такви какви што се, па затоа е важно да им се даде до знаење дека ништо што прават не може да ја промени љубовта што родителите, вклучително и татковците, ја чувствуваат кон нив.
- Убава си
Вашата ќерка ќе слушне дека е убава многу пати во животот, но тоа е нешто што треба најчесто да го слуша од нејзиниот татко. Кога таткото ги кажува овие зборови, објаснуваат експертите, тој ја гради довербата на својата ќерка. Светот ќе се обиде да ѝ каже дека мора да изгледа на одреден начин, да носи одредена облека или да купува одредени производи за да биде убава, но ако уште од мала ѝ ја всадите вистината дека секогаш е убава, тоа ќе остане со неа засекогаш.
- Ти вредиш
Таткото треба да ѝ каже на својата ќерка дека има вредност од истите причини поради кои треба да ѝ каже дека е убава. Со ова можете да ѝ покажете на вашата ќерка дека има вредност, не поради нешто што го направила, туку затоа што е ваша и затоа што ја сакате. Исто како и со убавината, светот ќе се обиде да ја изврти вистината за вредноста на вашата ќерка и да каже дека вредноста доаѓа само од она што таа го нуди или она што го прави. Затоа треба да ја научите ќерката дека нејзината вредност доаѓа однатре, а тоа ќе ѝ биде постојан потсетник во текот на животот, велат експертите.
- Секогаш ќе бидам тука за тебе
На вашата ќерка секогаш ѝ треба некој што ќе биде на нејзина страна, на кој може да му се довери и со кого може да ги сподели сите свои соништа. Освен тоа, ѝ треба некој што ќе ѝ обезбеди сигурност кога најмногу ќе ѝ недостига. Тоа треба да биде нејзиниот татко. Обидете се да го научите вашето девојче дека секогаш може да ви се довери и да ви се обрати, дека може да ви верува и дека секогаш ќе бидете тука за неа, кога и да ѝ затребате.
- Можеш да ми кажеш сè
Треба да го научите вашето девојче дека секогаш ќе бидете на нејзина страна, особено кога има проблеми во животот. Ова почнува уште од раното детство, кога ќе ја учите вашата ќерка да не ги крие своите проблеми од вас, туку да ги споделува и решава со вас. Така ја стекнувате нејзината почит и доверба и ја учите дека сте личност на која секогаш може да се потпре.
912