Објавата на една мајка на „Редит“ предизвикала дебата меѓу родителите за работите со кои тие сакаат да се фалат со своите деца, а не се нивна заслуга. Постојат некои навики што ги имаат бебињата, а кои немаат никаква врска со родителството, барем не толку колку што се мисли. Ова е листата со најчестите работи со кои се фалат родителите, а кои немаат врска со воспитувањето или нивните родителски вештини.
Бебе што спие цела ноќ
Доколку веќе не сте биле свесни, некои бебиња навистина спијат подобро од другите. А можеби уште позагрижувачки е тоа што ако родителот се пофали колку одлично спие нивното бебе, веројатно не знае дека тоа нема никаква врска со родителството. „Не можете да го научите вашето бебе да спие во текот на ноќта. Да, можете да воспоставите добри навики за спиење и да работите на тренинг за спиење соодветен на возраста, но некои бебиња едноставно спијат подобро од другите“, напишала една мајка.
Бебе што добро јаде
Друга мајка се осврнала на доењето и хранењето и открила дека повеќето родители се фалат дека нивното дете јаде добро, како тоа да има врска со нив. „Повеќето родители се однесуваат како да го научиле бебето да јаде со голема желба. Тоа не е точно, а нивните изјави често предизвикуваат чувство на вина кај оние мајки што имаат проблеми со доењето или хранењето на своите бебиња со шише“, објаснила таа.
Бебе што лази или порано проодело
Исто како што некои бебиња спијат добро од првиот ден, а други претпочитаат да останат будни во текот на ноќта, сите бебиња се развиваат со различна брзина. Нема смисла да се споредуваат развојните пресвртници на бебињата, освен ако не постојат одредени грижи за здравјето на вашето дете што треба да ги споделите со вашиот педијатар. „Можете да правите вежби за стомак и сите работи што треба да ги правите, а сепак да имате бебе кое заостанува во развојот. Не можете да го воспитувате во насока да биде напредно во развојот“, напишала една мајка.
Бебе што рано се одвикнало од пелени
Исто како и сите други големи пресвртници, подготвеноста за одвикнување од пелени е различна за секое дете. Некои се повеќе од подготвени за одвикнување до двегодишна возраст, додека на други им треба повеќе време. „Нема правилно или погрешно кога станува збор за одвикнувањето од пелени, некои деца ќе вршат нужда на нокшир веднаш штом ќе почнат да одат, додека други ќе бидат подготвени за тоа дури на две-три години. Не чувствувајте вина ако видите дека детето на вашата другарка нема пелени, а е на иста возраст со вашето малечко. Не станува збор за воспитување“, напишала друга мајка.
Бебе без барања
Меѓутоа, мајките на „Редит“ се согласиле дека најлошото нешто што родителите можат да го кажат за своето бебе е колку тие се без барања. „Некои родители често се фалат дека нивното бебе не плаче многу, си игра само и не бара големо внимание. Секако, сите сме љубоморни на нив. Бидете сигурни дека ќе бидете горди на семејството што сте го формирале, на вашиот раст и посветеност како родител, но бидете подготвени за една универзална вистина за родителството – штом почувствувате дека знаете што правите, вашето дете ќе продолжи со следната фаза од животот, во која сè ќе се промени“, објаснила еден од нив.
912