Ако не ви е пријатно да разговарате со вашиот гинеколог за некои работи, не сте единствени. Постојат одредени работи што дури и вашите најдобри пријатели не ги знаат. Иaко секогаш треба да бидете искрени со лекарите, бременоста е особено важен период за ова.

– Не постои глупаво прашање или признание кога станува збор за трудница или кој било пациент. Во бременоста е особено важна искреноста бидејќи вклучена е и друга личност, а одредени работи и однесувања може да имаат значително штетни ефекти врз жената или нејзиното дете – вели гинекологот Шери Рос.

Еве за кои работи треба да бидете искрени со гинекологот.

1. Ви е страв од новата улога како мајка

Овие чувства се сосема нормални и очекувани – и важно е да разговарате за нив со вашиот гинеколог.

– Освен што физички го менувате вашето тело, вие ментално се менувате и се подготвувате за најголемата промена во вашиот живот –  вели гинекологот Леа С. Милхајзер.

– Ако имате историја на депресија, или во моментов или во минатото, и не сте земале лекови за депресија за да забремените, може да имате сериозни тешкотии да ја прифатите реалноста на вашата ситуација. Запомнете дека грижите не се знак на слабост и дека вашиот лекар е подготвен да ви помогне. Разговарајте за вашите чувства за да добиете понатамошни чекори.

2. Пиете алкохол во текот на бременоста

Иако не е целосно потврдено колку е штетен алкохолот во бременоста, сепак останува мислењето на повеќето експерти дека бремените жени треба да се воздржат од консумирање алкохол. Меѓутоа, ако не сте се придржувале целосно до оваа препорака, намерно или ненамерно, важно е да разговарате за ова со вашиот гинеколог.

– Многу жени не знаат дека се бремени кога се во четвртата или шестата недела и нормално е да консумираат алкохол во тоа време, а подоцна да се чувствуваат виновни или засрамени да му го признаат тоа на својот гинеколог. Но, исто така е важно да се има предвид дека неколку чаши вино или пиво нема да повредат колку постојаното консумирање во текот на целата бременост – вели гинекологот Шон Тасоне.

3. Пушите и не можете да се откажете

Пушењето, дури и во мали количини, е сериозен проблем за време на бременоста, особено кога пациентот не е искрен со својот гинеколог за тоа.

– Пушењето може да влијае врз крвните садови во плацентата, што резултира во забавен раст на фетусот, слаб развој на белите дробови и мозокот и зголемен ризик од синдром на ненадејна смрт на новороденче. Исто така, значително се зголемува ризикот од разделување на плацентата, познато како нарушување што може да биде катастрофално во бременоста – вели гинекологот Јана Маркидан.

Знаејќи дека сте пушач, вашиот гинеколог ќе побара дополнителни прегледи за да се осигури дека вашето бебе правилно расте и ќе можете да разговарате со вашиот гинеколог за можните стратегии што би ви помогнале да се откажете од пушењето.

4. Под голем стрес сте поради бременоста

Стресот не само што физички влијае врз нашето тело, туку влијае и врз емоциите и однесувањето. А ако носите бебе во стомакот, негативните ефекти од стресот можат да влијаат врз двајцата.

– Кога бремената жена е под стрес, се ослободуваат хемикалии што можат да влијаат врз бебето, ставајќи го бебето во поголем ризик од депресија, раздразливост и чувствителен темперамент. Без разлика дали сте во првиот или третиот триместар, разговарајте со вашиот лекар за нивото на стрес во вашиот живот, така што тој може да предложи активности што помагаат да се намали стресот, како што се топла бања, вежби за дишење, одење или јога – вели гинекологот Шери Рос.

5. Спиете со повеќе партнери

Вашиот гинеколог знае дека не сите бремени жени се во моногамна врска и е подготвен да ви помогне во секоја ситуација во која се наоѓате, но вие треба да бидете отворени и искрени.

– Повеќето тестови за ХИВ и хепатит и сексуално преносливи болести се прават на самиот почеток, затоа е потребно дополнително тестирање доколку жената подоцна има секс со друг партнер, особено затоа што многу сексуално преносливи болести немаат физички симптоми, но сепак можат да бидат многу штетни за бебето – вели д-р Маркидан. Со гинекологот треба да разговарате за времето кога сте имале сексуални интеракции за да можете да извршите соодветно тестирање. Исто така, ако не сте сигурни кој е татко на вашето дете, не бидете срамежливи. Вашиот гинеколог нема да ви суди, туку ќе разговара со вас и ќе ви помогне да преземете понатамошни чекори.

6. Партнерот ве злоупотребува

Да, ова е работа и грижа на вашиот гинеколог, особено затоа што злоупотребата се случува кај една од шест бремени жени. Физичкото или менталното малтретирање никогаш не е оправдано, но кога тоа се случува за време на бременоста, особено е важно да разговарате со вашиот гинеколог за тоа.

– Злоупотребата, која вклучува физичко, емоционално и сексуално насилство и закани, може да се влоши од новите стресови и нервози што доаѓаат со новата улога како родители – вели д-р Милхајзер. Вашиот лекар може да ви обезбеди соодветна медицинска помош – физички и психички – и да ви помогне да најдете безбедно место за престој.

7. Планирате патување за време на бременоста

Вашиот гинеколог треба да знае дали планирате да ја напуштите државата, особено за време на третиот триместар, кога може да имате компликации.

– Повеќето гинеколози ќе ви кажат да патувате во текот на вториот триместар бидејќи имате најмногу енергија во овој период и ризикот од компликации е релативно низок – вели д-р Милхајзер.

8. Имате зголемена или намалена сексуална желба

Постои вообичаена заблуда дека сексуалната желба кај жените се зголемува за време на бременоста, иако сексуалната желба може да остане иста или да се намали. Двете ситуации се сосема чести во бременоста – силна сексуална желба, како и нејзино целосно отсуство.

– Важно е да запомните дека сексуалната желба е уникатна за секоја жена, без разлика дали е бремена или не. Важно е жените да знаат дека е сосема во ред да разговараат за тоа со нивниот гинеколог, бидејќи е наша одговорност да слушаме, проценуваме и предлагаме потенцијални решенија – вели д-р Милхајзер.

Кога сексуалните проблеми се хронични – траат повеќе од шест месеци и предизвикуваат вознемиреност – жената може да има сексуална дисфункција. Губењето на желбата се јавува кај некои жени во одредени периоди од животот, како што се бременост или стресни периоди.

– Ако сте загрижени дека имате сексуална дисфункција, споделете ги вашите грижи со вашиот гинеколог, кој може да обезбеди решенија како што се терапија и потенцијален третман, откако веќе не сте бремени – вели д-р Милхајзер.

9. Со години не сте биле на стоматолог

Можеби изгледа смешно да се спомене ова во разговор со вашиот гинеколог, но добрата хигиена на устата може да има клучна улога во одржувањето на вашето бебе безбедно во текот на бременоста.

– Хормоналните промени во бременоста може да доведат до неколку промени во устата, особено во непцата – вели д-р Маркидан. Болеста на непцата може да доведе до предвремено породување ако не се лекува, па затоа е важно за вашиот гинеколог да знае дали поради некоја причина не сте посетувале стоматолог подолго време.

10. Не се храните здраво и не вежбате

– Лошата исхрана и прекумерната тежина не се шега, особено во бременоста, бидејќи го зголемуваат ризикот од гестациски дијабетес, вродени маани, висок крвен притисок, инфекција, поголемо бебе или царски рез, па дури и спонтан абортус – вели д-р Рос. Покрај тоа, вежбањето не само што ви помага да одржувате соодветна тежина, туку исто така ви дава енергија и издржливост што ви се потребни особено во текот на следните девет месеци. Вежбите со помал интензитет се безбедни во бременоста и сè додека не губите тежина и вашето бебе расте соодветно, нема за што да се грижите.

Извор