Малите деца сакаат да цртаат, а возрасните можат многу да научат од нивните дела. Иако е невозможно да се дијагностицира детето само врз основа на неговите цртежи, постојат детали кои треба да послужат како предупредување за родителите.

Психијатарот Клои Милавица вели дека состојбата на детето може да се процени само сеопфатно, но голем број аспекти што ги забележуваме на цртежите можат да бидат знак дека е време да се посети специјалист.

– Елементите во цртежот што се повторуваат, особено ако нивната сложеност не одговара на возраста, може да укажуваат на нарушувања од спектарот на аутизам. На пример, детето го црта истиот лик на куп хартија, одбива да нацрта нешто друго, користи само една боја на боица или фломастер, или црта многу убави монограми, црта јасни геометриски форми, иако тоа сè уште не би требало да може да го прави – објаснува Милавица.

Цртежите кои прикажуваат насилство или вклучуваат сурови детали може да укажуваат на можна психопатија или ПТСП кај дете кое доживеало трауматично искуство, истакнала специјалистката.

-Ако дете под седум години црта сцени на сексуални односи, тоа може да укаже на предвремен сексуален развој или заведување од возрасни. Депресивните состојби се карактеризираат со цртежи со изобилство на темни бои и индикации за самоповредување – продолжила докторката.

Психијатарот додава дека некои однесувања укажуваат на доцнење во менталниот развој.

-Проблемот е ако детето не покажува интерес за цртање, ако не може да нацрта линија на хартија на возраст од три и повеќе години, и/или не може да држи молив и не може да засенчи област без да излезе надвор од контурите на фигурата на возраст од пет до шест години – забележува таа.

Доколку забележите нешто од горенаведеното, Милавица советува да не паничите, туку да контактирате со педијатар, психолог или психијатар кои ќе го проценат детето.

Извор