Прегледите на бебињата се извршуваат уште во родилиштето, во првите часови по раѓањето. Лекарот првпат ќе го прегледа вашето бебе при раѓањето. Целта на тој преглед е да се утврди виталноста на бебето, која се оценува со АПГАР-скор за да се уочат евентуални проблеми и аномалии со кои е родено.

АПГАР-скорот е универзален начин да се провери состојбата на детето на крајот од првата и петтата минута по раѓањето. Со оцени 0, 1 и 2 се оценуваат пет карактеристики на виталноста:
Аспект – боја на кожа;
Пулс – број на срцеви отчукувања во минута;
Гримаси – реакција на катетерот: кашла, кива, се брани;
Активност – тонус на мускулите, активни движења;
Респирација – дишење.

Ако збирот на оцените е 7 и повеќе, тоа значи дека бебето е во добра состојба. На бебињата со пониски оцени ќе им треба дополнителна нега, а понекогаш и лекување во одделението за специјална или интензивна нега. Повеќето бебиња по завршувањето на лекувањето ќе бидат добри.