Во сезоната на респираторни инфекции не е чудно што се јавуваат треска, кивање и кашлање, особено кај децата. Доколку одат во колектив, градинка или училиште, поплаките може да се повторуваат почесто бидејќи има околу 200 различни вируси што го напаѓаат горниот респираторен тракт.

Но, постои и група болести кои доведуваат до повторливи трески кај децата. Ако треска е присутна на секои 21 ден, треба да се сомневате во т.н. циклична неутропенија, во која вредноста на еден поттип на бели крвни зрнца е намалена. Повторувањето на температурата може да предизвика и ПФАПА-синдром.

Оваа болест се карактеризира со треска, болки во грлото, зголемени жлезди на вратот и рани во усната шуплина – објаснува д-р Срѓан Милиќевиќ, специјалист ОРЛ од Србија.

– Крвната слика покажува знаци на воспаление, леукоцитите, седиментацијата и ЦРП се покачени, а температурата и покрај антибиотиците не паѓа. Лекарите кои не знаат за оваа болест ги менуваат антибиотиците, а болеста во меѓувреме поминува сама од себе. И така натаму – вели тој.

Нема специфични тестови за ПФАПА-синдромот, а дијагнозата се базира на клинички критериуми. Високата температура исчезнува по мала доза на кортикостероиди, но болеста веројатно ќе се појави повторно за еден месец. Исцелувањето е спонтано по неколку години. Друга опција е операција на крајниците, која резултира со излекување во повеќе од 90 проценти од случаите.

ПФАПА-синдромот е автоинфламаторно заболување – посочува д-р Милиќевиќ.

-Карактеристично е што не е испровоцирано од некоја причина од надворешната средина, ниту е придружено со создавање на автоантитела, односно автореактивни Т-лимфоцити. Причината за автоинфламаторните синдроми е нарушување во синтезата или функцијата на протеините кои учествуваат во регулацијата на имунолошкиот систем – потенцира тој.

Болеста најчесто се јавува на возраст од една до три години, но може да се појави нешто подоцна, почесто кај машките деца. Интервалите на појава обично не се редовни, а мала доза на кортикостероид што се администрира еднаш ја прекинува тековната фебрилна епизода, но не спречува нова. Од карактеристичните симптоми на болеста, раните може да бидат отсутни.

Вируси и бактерии

Болести кои исто така можат да предизвикаат треска во редовни интервали се:

-фамилијарна медитеранска треска,

-хиперимуноглобулинемија D,

-инфекција со Епштајн-Баровиот вирус,

-Ирегуларната појава на температура, освен со бактериски, вирусни или паразитски причини, често се поврзува и со автоимуни заболувања.

Извор