Една од причините зошто родителите буквално се опседнати со породилната тежина на своите бебиња е и затоа што тоа е единствениот мерлив параметар за кој, како родители, можете да се фатите. Но, сепак, малите бебиња може да бидат совршено здрави, додека, од друга страна, оние со нормална тежина може да имаат некои здравствени тешкотии. Важно е да се знае дека породилната тежина зависи од времето што детето го поминало во матката, односно од гестацискиот период. Децата што се родени во термин ќе имаат помала породилна тежина, а оние по терминот се поголеми од просечните бројки.

Кога бебињата не влегуваат во категоријата просек?

Дури и бебињата што се родени на терминот или малку подоцна – понекогаш не влегуваат во категоријата просечна тежина поради многу причини. Понекогаш во прашање е само генетика, можеби и двајцата родители се ниски или и двајцата високи и имаат повеќе килограми. Најчесто помалата или поголемата породилна тежина е одраз на мајчиното здравје. Ако бебето тежи помалку од 90 отсто од просекот на децата од својата гестациска возраст, се смета за „малечко“, а една од причините е што како фетус не примило поголема резерва на хранливи материи или кислород кои се потребни за нормален развој на телото и ткивата. Одредени здравствени тегоби на трудниците може да придонесат за намалена породилна тежина, на пример, хипертензија, проблеми со покачен крвен притисок или проблеми со срцето, дишењето или бубрезите. Исто така, некои нездрави навики, како пушење и пиење алкохол во текот на бременоста, може да бидат причини за ниска породилна тежина на бебето.

Новороденчето се смета за големо кога надминува до 90 отсто од породилната тежина од просекот на бебињата од својата гестациска возраст. Големата породилна тежина може да биде предизвикана од голема тежина на мајката или голем број добиени килограми во бременоста. Исто така, трудниците што боледуваат од гестациски дијабетес често раѓаат деца со поголема породилна тежина. Ако нивото на шеќер во крвта на трудницата е константно високо, вишокот шеќер доаѓа до бебето, што го зголемува ризикот од настанување различни болести и состојби, а меѓу другото, мајката раѓа „големо“ бебе.

Губење на тежината по раѓањето

Интересно е што новороденчињата со „нормална породилна тежина“ првата недела по раѓањето губат до 10 отсто од својата почетна тежина, додека децата со зголемена породилна тежина губат и повеќе. Бебињата хранети со млечна формула најчесто губат 5 отсто од својата породилна тежина, а оние што се доени – од 7 до 10 отсто. Но, без разлика на тоа, ако се роди новороденче со малечка или голема породилна тежина, и понатаму може да биде сосема здраво.

А што се однесува до губењето тежина во текот на првата недела, не треба да се загрижувате бидејќи децата во текот на следниот месец се враќаат на својата породилна тежина или дури ја надминуваат.

Извор