Дисциплинирањето на детето не значи казнување, туку подобрување на однесувањето. Ова ќе обезбеди детето да порасне во ментално и социјално стабилна личност. Но, истата тактика на дисциплинирање на двегодишно дете нема да биде толку успешна со десетгодишно дете. Не постои лек кој е универзален за сите возрасти, но за секоја возраст има ефикасна стратегија. Еве што препорачуваат педијатрите за да го научите детето на дисциплина во зависност од неговата возраст.

Деца од 1 до 2 години

Децата во оваа фаза сакаат да го истражуваат светот и треба да им се дозволи тоа. Работи што треба да се избегнуваат се тајмаут-моментите бидејќи малите деца се чувствителни на стравот од напуштање, викање и забрани.

Педијатрите советуваат да го отстраните вашето дете од активностите или предметите што ги сметате за опасни со тоа што ќе му кажете цврсто „не“. На пример, ако детето сака да дофати топла чинија, кажете му: „Не, жешко е!“ Исто така, пренасочете го вниманието на детето на друг предмет и останете блиску до него за да се уверите дека не мисли оти е несакано или незаштитено.

Деца од 2 до 3 години

Децата меѓу 2 и 3 години сакаат да стекнат автономија, но родителите мора да постават граници, што може да доведе до фрустрација и изливи на бес кај дечињата. Не треба да ја изгубите контролата пред вашето дете. Смирете го детето, прашајте го зошто така се однесува и спокојно и јасно објаснете му ја ситуацијата. Откако ќе го утешите детето, поставете пример за соодветно однесување.

Деца од 3 до 5 години

Децата од градинка ги знаат границите, но сепак им треба помош за да ги интернализираат правилата и да развијат доверливо и здраво расудување. Не треба да прибегнуваме кон долги разговори и закани, туку доследно да ги спроведуваме правилата, да даваме насоки и да укажуваме на соодветно однесување.

Исто така, педијатрите советуваат дека на оваа возраст, доколку детето е надвор од контрола, треба да се воведе тајмаут. Детето треба да го исклучите онолку минути колку што изнесува неговата возраст, што значи најмногу пет минути.

Деца од 6 до 12 години

Иако сакаат поголема контрола, децата во оваа фаза сè уште не ги анализираат своите одлуки толку темелно како возрасните. Водете разумен разговор без осудување, воспоставете и спроведувајте куќни правила, отстранете ги привилегиите како што се играчките и десертите и дозволете логичните последици од лошото однесување да влијаат врз детето.

Деца од 13 до 18 години

Адолесцентите се познати по тоа што им пркосат на правилата. Тие се обидуваат да се пронајдат себеси и да ја потврдат својата индивидуалност, па малку се оддалечуваат од родителите и се склони кон импулсивно однесување. Затоа пубертетот се нарекува возраст на тешки конфликти.

Детето на оваа возраст не треба да се омаловажува, да му се држат предавања и да се користи фразата „Ти реков“. Наместо тоа, поставете правила и држете се до нив, дозволете да се појават природните последици од недоличното однесување, избегнувајте конфронтации, преговарајте за помалку важни прашања, дајте му на вашето дете чувство на независност и останете достапни.

Извор



912

X