Истражувачите ги советуваат родителите да внесат риба во исхраната на своите деца откако една студија открила дека јадењето риба на неделна основа е поврзано со повисок коефициент на интелигенција и подобро спиење.

Истражувачите од Универзитетот во Пенсилванија ги анализирале коефициентите на интелигенција, навиките во јадењето и спиењето кај повеќе од 500 кинески деца на возраст од 9 до 11 години. Откриле дека децата што јаделе риба на неделно ниво имале приближно 5 поени повеќе на тестовите за интелигенција отколку оние што никогаш или многу ретко јаделе риба. Децата што јаделе риба понекогаш имале 3 поени предност од оние што никогаш или многу ретко консумирале.

Истражувачкиот тим, составен од Јиангхонг Лиу, Џенифер Пинто-Мартин, Александра Ханлон и Адриан Реин, истакнал дека откритијата се базираат на веќе постојни истражувања за позитивните ефекти од омега 3-масните киселини. Тие биле поврзани со интелигенцијата и спиењето независно, но никогаш порано не биле споени во едно.

Професорот Реин вели дека придобивките се двојни. Истражувањето било објавено во магазинот „Научни извештаи“, а исто така преку него биле испитувани и родителите во врска со квалитетот на сонот на децата, вклучувајќи го и прашањето колку често децата се будат навечер и колку се поспани во текот на денот. Откриено е дека зголемената консумација на риба е поврзана со помалку пречки во сонот.

Истражувачот Пинто-Мартин истакнува дека родителите треба да им даваат на децата риба од 10-месечна возраст, а треба редовно да ја јадат од две години. Треба само да се внимава рибата да е добро сечкана и да нема коски.

– Раното запознавање со вкусот ќе доведе до поголемо уживање подоцна. Навистина треба да биде вложен труд, особено во културите каде што рибата не се служи вообичаено – вели Пинто-Мартин.

Американската администрација за храна и лекови посочува бремените жени и деца да јадат една до три порции риба неделно.

Автор: Шон Розман