Од МТСП укажуваат дека ослободувањето од работни активности на родители на деца/лица со попреченост е проширено на родители на деца и млади и над 10-годишна возраст

Министерството за труд и социјална политика (МТСП) ги повикува сите вработени и сите работодавци строго да се придружуваат до мерките што ги донесе Владата на седницата одржана на 10 март 2020 за превенција од ширење на болеста Ковид-19 (коронавирус).

Се дозволува платено отсуство на 1 родител на деца до 10 години во текот на наредните две недели, како и на родител на дете постаро од 10 години со попреченост кое оди во дневен центар, откако Владата одлучи да не работат образовните институции во наредните 2 недели.

Секое непочитување на препораката за ослободување од работни обврски на еден од родителите на деца до 10-годишна возраст да се пријави во Државниот инспекторат за труд на телефонскиот број 151 31.

– Отсуствата од работа ќе се докажуваат со потврди кои ќе ги издаваат градинките и основните училишта, на име на родителот-корисник на мерката за ослободување од работа поради грижа за дете со навршена возраст до 10 години, во кои ќе биде наведен и временскиот период за кој се однесува. Тие ќе треба да се достават до секторот за управување со човечки ресурси или раководителот/директорот на институцијата/компанијата во која работи, до терминот за пресметка на следната плата – информираат од МТСП.

Во однос на прекинот на работата на дневните центри за згрижување лица со попреченост, од МТСП укажуваат дека ослободувањето од работни активности на родители на деца/лица со попреченост е проширено на родители на деца и млади и над 10-годишна возраст. Родителите треба по истиот принцип наведен погоре да достават потврда дека лицето е корисник на услугата дневен центар за лица со попреченост.

– Уште еднаш апелираме до сите граѓани да се придржуваат до препораките, само заеднички можеме да се заштитиме и да го заштитиме заедничкото здравје – потенцираат од МТСП.