Разводот е секогаш тежок, особено ако брачниот пар што се разведува има деца. Истражувањата покажуваат дека тоа е трауматично искуство за децата, па поради тоа, некои родители избираат иновативни решенија за да го направат овој процес што е можно помалку болен.

На англиски, овој пристап се нарекува „гнездење“ (birdnesting) – на децата им е дозволено да останат во семејниот дом или стан каде што наизменично поминуваат време со двајцата родители. Секој од законските старатели останува во станот одреден период, а потоа заминува на друго место кога не е „на должност“. Овој концепт е именуван по начинот на кој птиците се грижат за своите младенчиња. Птиците остануваат во гнездото, додека родителите наизменично летаат и се грижат за нив.

На овој начин децата остануваат во својот дом, училиште и блиску до своите пријатели и се заштитени од стресот од преселување и наизменичен престој во становите на нивните родители.

Иако овој концепт е релативно непознат во светот, станува сѐ попопуларен во западните земји, особено кај семејствата од средна класа. Адвокатите известуваат за зголемување на бројот на клиенти кои се одлучуваат за „гнездење“ во Америка, Холандија, Австралија…

Една неодамнешна студија во Англија покажува дека 11 отсто од разведените или разделени родители го испробале овој пристап. Во Шведска, оваа практика е забележана уште од 70-тите години.

Кога не се со децата, некои разведени парови поминуваат време со своите родители или во изнајмени станови што ги делат со цимери. Побогатите можат да си дозволат сопствени станови. За многумина, ова е привремено решение, но некои живеат така со години.

Со оглед на тоа дека ова е релативно нов тренд, експертите немаат сигурни показатели дали овој пристап е подобар кога станува збор за благосостојбата на децата. Некои веруваат дека децата се поштедени од стресот на разводот и можното иселување од семејниот стан, додека други веруваат дека гнездењето не е решение бидејќи ги збунува децата, па тие не можат да ја разберат и да ја прифатат реалноста на разводот.

Психолозите предупредуваат дека треба да се внимава при промовирање на овој концепт бидејќи може да има сосема спротивен ефект од посакуваниот. Некои веруваат дека децата треба да се соочат со последиците од разводот заедно со нивните родители и дека тоа искуство ќе им помогне да станат посилни возрасни. Некои веруваат дека овој тренд е исто толку штетен за менталното здравје на децата како и вообичаеното заедничко старателство каде што децата наизменично остануваат кај двајцата родители.

Не треба да се заборави дека овој тренд има негативно влијание врз разведените родители, кои се спречени да продолжат со својот живот.

Извор