Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Ќерка ми има 5 години. Пред некое време имаше невреме и оттогаш детето не е исто. Не сака да излегува надвор кога дува ветер, се плаши кога грми или кога ќе се наоблачи времето. Ве молам за совет.

ОДГОВОР: Како родител, секако дека ви е тешко да го гледате вашето дете исплашено и вознемирено и да не сака да излезе надвор кога се случуваат овие природни појави. Тоа ве фрустрира и веројатно ве прави тажни во исто време.

Стравот е природна емоција која ја чувствуваме кога се соочуваме со некоја појава или ситуација која е опасна. Кога се плашиме, се менува нашето однесување терајќи нѐ или да бегаме или да напаѓаме. Стравот обично се појавува на многу рана возраст. Како што детето минува низ различни фази на развојот, неговите стравови се менуваат. Тие доаѓаат и си одат додека некои други остануваат. И оваа емоција, како и сите други, е многу важна во развојот на детето бидејќи ја исполнува функцијата на преживување што му овозможува на детето да се однесува претпазливо и да ги избегне опасностите.

Децата на возраста во која е вашето дете може да се плашат од овие природни феномени поради различни причини, вклучувајќи го недостигот на разбирање, чувството на беспомошност, преосетливоста на бучава или светлина, лошото искуство од минатото или недостиг на изложеност.
За нив, грмењето, ветерот и молњите изгледаат како случајни и неконтролирани појави со гласни звуци, па им се страшни и непријатни.
Кога децата се мали, тие гледаат како ние возрасните ги доживуваме овие појави и како реагираме на нив. Поради тоа, ако вашето дете видело како вие или братот и сестрата сте реагирале, ако сте биле вознемирени и исплашени, ако сте давале некој коментар или сте се однесувале премногу заштитнички, тоа ја има примено пораката дека тоа е многу опасно.

За да ѝ помогнете, потрудете се да ги потврдите нејзините чувства, дека е во ред да биде исплашена и дека ја разбирате. Не обидувајте се да ја убедувате дека нема ништо страшно во тоа бидејќи за неа тоа е страшно.
Таа сѐ уште е мала, па можете да поминете сѐ низ игра, да глумите како се криете дома, да употребите фен што дува или некој вентилатор за тоа да биде ветерот, бидете смирени и насмеани и сето ова ќе биде забавно. Можете да излезете и таа да купи гумени чизми за кога ќе врне дожд. Можете да разговарате од што се плаши, што ѝ е толку страшно. Што мисли дека ќе направи ветерот или грмењето?
Кажете ѝ дека тоа се природни појави и дека не се опасни за нас. Можете да гледате некој цртан или да ѝ нацртате како се создаваат овие појави за подобро да ги разбере.
А во време кога се случуваат, бидете присутни, дајте ѝ чувство на сигурност, прегрнете ја, но немојте да се однесувате презаштитнички. Можете, исто така, да ѝ дадете задача да црта или да читате нешто заедно за да може да се фокусира на нешто друго. И. секако. почеста изложеност на ветер, кога врне или кога има невреме 🙂 и пофалете ја тогаш колку е храбра.

Децата постојано учат од нас и го доживуваат светот и случувањата преку нашите реакции. Бидете смирени и покажете разбирање. Со ваша помош, таа ќе научи да управува со својот страв и да се чувствува посигурно.

Доколку имате потреба од разговор и дополнителна помош за развојот на вашето дете, потребно е да закажете родителско советување и психоедукација на sovetuvanje@gmail.com

Одговара: Билјана Манасова-Јовановиќ, дефектолог и психотерапевт; Психотерапија и советување 
е-пошта: sovetuvanje@gmail.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.