Во денешниов свет жените се посилни од кога било. Ние сме силни и амбициозни, знаеме што сакаме и се стремиме да го добиеме тоа. Повеќе не живееме во општество кое очекува жените само да готват, чистат, раѓаат деца и да молчат.

Изминавме долг пат за поместување на традиционалните женски улоги во општеството. Денес, ние сме жени со кариера, па и шефици, ги истражуваме нашите желби, страсти, си поставуваме цели и ги кршиме лидерските бариери. Сепак, забележав дека општеството често со презир гледа на жените кои, всушност, повеќе сакаат брак и деца отколку да постигнат цели во кариерата, како да немаат доволно големи соништа. Тоа е речиси исто како да се каже: „Зошто се ограничуваш? Толку сме далеку од деновите кога бевме само сопруги и мајки. Треба да имаш повеќе амбиции“.

Иако верувам дека жената може да има и семејство и кариера, верувам и дека е привилегија на самата жена ако сака да избере само едно од овие две. Да се биде мајка е работа со полно работно време – вие сте одговорни за новиот живот кој сте помогнале да се создаде и се грижите за вашето дете до крајот на животот. Воспитувањето дете е најголемата инвестиција што можете да ја направите на овој свет, па ако најголемиот сон на жената е да има семејство, тоа е сосема во ред. Сите ние чекориме по различни патишта во животот и имаме различни приоритети.

Кога станува збор за кариерата и семејството, жената нема само еден пат по кој треба да оди. Во денешниот свет воден од кариера, честопати забораваме на важноста која подразбира да имаме исполнети семејни односи во нашите животи, додека се стремиме кон остварување на нашите соништа. Иако е одлично да се има силна работна етика, исто така е важно да се инвестира време во нашите односи.

Една од тажните работи на овој свет е тоа што многу луѓе живеат кратки животи и умираат на толку млади години, а секојпат кога слушам за млад човек кој починал, тоа предизвикува сите признанија, пари и материјални работи на светот да изгледаат толку мали. Едно нешто што секогаш останува моќно, сепак, се односите и животите на кои влијаеле поединците. Затоа, сонувањето за брак и деца – е сон за оставање влијание што ќе трае вечно.

Парите нема да ви кажат дека ве сакаат, без разлика дали сте живи или не, но силната семејна врска ќе трае во вечноста. Се разбира, ако жената сака прво да се фокусира на кариерата, а подоцна да основа семејство, има целосно право на тоа. Меѓутоа, ако таа сака само пари и статус, каква е користа од толку напорна работа за да се етаблира на работното место, само за да се врати дома каде што нема со кого да го сподели својот успех?

Се сметам за многу амбициозна жена. Само што ја завршив втората година на универзитет, студирам историја и меѓународни односи, а сум и хонорарен писател и поминав повеќе време во новинарско стажирање. Сепак, моите амбиции за кариера никогаш нема да ги надминат моите соништа – еден ден да се омажам и да имам деца. На крајот на краиштата, работата никогаш не може да го заземе местото на љубовта што произлегува од поврзаноста меѓу луѓето.

Сегашната состојба на светот ни помага да сфатиме дека односите се исто толку важни како и работата.

Да се сонува за успешна кариера е прекрасно, но кој вели дека сонувањето за успешен брак и деца не е исто така доволно голем сон? Без разлика дали сакаме кариера или семејство, или пак и двете, на сите треба да ни биде дозволено да го живееме нашиот живот најдобро што умееме, со сопствените цели, соништа и приоритети.

Автор: Габриел Роксон

Извор