Многу студии докажале дека мозокот буквално се менува кога жената ќе се породи, а многу мајки веројатно ќе го потврдат истото. Клишето дека човекот повеќе не е ист откако ќе добие дете е всушност поблиску до вистината отколку што се мисли.
Но, како всушност се менува мозокот на жената по породувањето? Имено, научниците потврдиле дека женскиот мозок се менува побрзо и подрастично за време на бременоста и во првите месеци од животот на детето отколку во кое било друго време, вклучувајќи го и пубертетот.
Истражувачи од Медицинскиот факултет на Универзитетот „Јејл“ проучувале како мозокот на мајката, или сивата материја, се менува по породувањето. Тие ги проучувале мајките од две до четири недели и четири месеци по породувањето. Со правење магнетна резонанса на мозокот и интервјуирање на секоја мајка во двете временски точки тие откриле зголемување на сивата материја во мозокот.
Сивата материја му помага на мозокот да ги процесира сетилните информации, сигнализирајќи им на нервните клетки да реагираат. Тоа во суштина ви помага да донесувате одлуки и да реагирате на светот околу вас со вашите постапки и емоции. Студијата покажала дека зголемената сива материја значи повеќе позитивни одговори од мајката секогаш кога бебето ѝ сигнализира, без разлика дали преку звук или движење. „Вашиот мозок се насочува и ја менува својата форма за подобро да се грижи за бебето”, заклучиле експертите од споменатата студија.
Сите мисли се подредени на вашето бебе
Како што заклучуваат експертите, по породувањето, мозокот на мајката е речиси под контрола на мислите за нејзиното бебе. Мајката го мери времето помеѓу давање храна, се прашува дали има доволно пелени, го истражува долгиот список со прашања што ги има за педијатарот и врти во главата бескраен список со задачи што ја чекаат. Бебето буквално станува цел нејзин свет. Исто така, одговорноста и долгиот список со обврски се нешто за кое мајката постојано размислува.
Имено, заедно со новите сеопфатни размислувања доаѓа и одговорноста и сè поголемата листа со обврски. Тежината на одговорноста е особено оптоварувачка за мајката.
„Може да се најдете во ситуација да се прашувате што повеќе можете да направите како мајка, дали ги носите правилните одлуки за нивниот развој, а честопати се случува и планирање за иднината, на пример, колку долго ќе доите, дали ќе можете да го запишете вашето дете во дневен престој и слично“, објаснуваат експертите.
Има промена во хормоните, но и во емоциите
Кога жената ќе стане мајка, нејзините емоции се менуваат со нејзините хормони. Експертите објаснуваат како хормоните се менуваат и значително се зголемуваат за време на бременоста. Набргу по породувањето тие нагло паѓаат. Потоа, ако одлучите да доите, на пример, целиот процес на доење и одвикнување предизвикува вашите хормони да продолжат да растат, што предизвикува емоционални промени. Имено, вашиот мозок во мајчинството го водат емоциите, особено во постпородилниот период.
Хормоните можат да ја променат анатомијата на вашиот мозок
Многу истражувања спроведени досега покажале дека хормоните како што се пролактинот, окситоцинот или естрогенот, исто така физички го менуваат обликот на мозокот кај мајките. Тие се намалуваат и растат во различни области додека го „реструктуираат“ нејзиниот мозок за да создадат одредено чувство на приврзаност.
Исто така, експертите забележуваат дека гореспоменатите природни промени во мозокот им помагаат на жените во текот на мајчинството, но можат да бидат корисни и подоцна во животот, кога, на пример, треба да се грижат за внуците или да преземат други слични улоги.
912