За време на првата посета на педијатарот, тој, меѓу другото, ќе ги провери вродените рефлекси на бебето, како што се рефлексот на фаќање, рефлексот за автоматско одење, Моро рефлексот, асиметричниот тоничен рефлекс и рефлексот на цицање. Присуството на рефлексот Моро е важен показател за правилниот невролошки развој на вашето новороденче. Но, дали знаевте дека колку и да е пожелен овој рефлекс, може да ве остави со непроспиени ноќи во првите месеци со вашето бебе. Бидејќи тоа е рефлексот Моро кој го буди вашето бебе дури и од најдлабок сон.

Како да го препознаете рефлексот Моро?

Сите бебиња се раѓаат со одреден број вродени рефлекси. Моро рефлексот, исто така познат како рефлекс на вџашување, е еден од примитивните рефлексни одговори кои имаат улога да го заштитат бебето. Веројатно сте забележале дека вашето новороденче одеднаш се грчи за време на спиењето – токму тоа е рефлексот Моро на дело.

Всушност, тоа е рефлексна реакција на доенчињата на ненадејна промена во околината (како гласна бучава или силна светлина), која се карактеризира со ненадејно истегнување на рацете и на нозете, а потоа враќање во положбата за гушкање.

Две фази на рефлексот Моро

Бебето ќе го доживее она што најдобро може да се опише како чувство на слободен пад, реагирајќи со кревање и истегнување на рацете. Понекогаш оваа фаза е придружена со остро и гласно вдишување. Оваа фаза му помага на бебето да реагира на непријатни дразби.
Рацете и нозете на бебето потоа се свиткани поблиску до телото во мала фетална положба. Оваа фаза му помага на новороденчето да се залепи за мајката, како начин да се заштити од паѓање.
Всушност, многу е пожелно бебето да го има овој рефлекс бидејќи тоа е показател дека неговиот мал нервен систем правилно се развива. Сепак, една од причините зошто бебињата ненадејно се будат е рефлексот Моро.

Имено, овој рефлекс се активира со сите нагли промени во сензуалната стимулација:

-гласна бучава
-ненадејни движења или ненадеен допир
-ненадејна промена на интензитетот на светлината
-секој настан што го исфрла бебето од рамнотежа – кога е ставено во креветчето и, на пример, кога ќе го извадите од кадата
-ненадејно вртење на бебето.

Некои од овие промени се речиси незабележливи, но новороденчето кое е навикнато 9 месеци да биде во безбедното опкружување на утробата е многу чувствително додека не се навикне на нив.

Колку долго трае рефлексот Моро?

Рефлексот е најизразен кај новороденчињата, но неговиот интензитет постепено се намалува и обично целосно исчезнува до 5. или 6. месец од животот. До 6-тата недела, мускулите на вратот на бебето се зајакнуваат и стануваат пофункционални, па овој период се зема како почеток на „олабавување“ на рефлексот Моро.

Во првиот месец на новороденчето му е потребна вашата помош за да се справи со новите дразби од надворешниот свет, како што се гласни звуци и ненадејни движења, а повивањето може да му даде чувство на сигурност како да е во утробата.

Од 2. до 3. месец

Бебето станува помирно во вашите раце. Кога рефлексот ќе го разбуди, постојаното повивање го смирува бебето.

Од 4. до 6. месец

Детето се развива и му се зајакнуваат мускулите. Рефлексот почнува да се намалува и исчезнува до 5. или 6. месец. Време е да престанете да го повивате и да го ставите во вреќа за спиење најдоцна во 4. месец.

Која е улогата на повивањето?

Повивањето ги ограничува движењата на детето додека го ублажува непредвидливото и создава чувство на сигурност слично на она во утробата. Повивањето најдобро функционира за да го смири рефлексот Моро ако се воведе веднаш по раѓањето, а ако го правите тоа постојано како дел од ритуалот пред спиење, создава асоцијација дека е време за одмор.

Извор