Околу една милијарда млади луѓе низ светот се изложени на ризик од губење на слухот во подоцнежните години поради слушање прегласна музика преку слушалки или присуство на места или концерти со прегласна музика, покажуваат податоците собрани од Светската здравствена организација врз основа на повеќе студии.
СЗО ги повика младите да посветат поголемо внимание на нивните навики за слушање, а владите и производителите да направат повеќе за да го заштитат здравиот слух на поединците.
24% од младите се изложени на прегласна музика од слушалки
Анализата објавена во списанието „BMJ Global Health“ ги разгледа податоците од 33 научни студии објавени на англиски, шпански, француски и на руски јазик во последните две децении. Истражувањето опфатило повеќе од 19.000 учесници на возраст од 12 до 34 години. Откриено е дека 24% од младите се изложени на прегласна музика од слушалки на уреди како паметни телефони. Исто така, било откриено дека 48% од нив биле изложени на нездраво ниво на бучава на места како ноќни клубови или концерти.
Комбинирајќи ги достапните податоци, се проценува дека меѓу 670.000 и 1,35 милијарди млади луѓе би можеле да бидат изложени на ризик од губење на слухот во подоцнежниот живот. Опсегот е толку широк делумно затоа што некои млади луѓе се изложени на ризик од двата фактори, вели Лорен Дилард, аудиолог од Медицинскиот универзитет во Јужна Каролина, која ја водела студијата.
Дилард изјавила за АФП дека најдобриот начин да се намали ризикот од губење на слухот поради гласната музика од слушалките е да се намали јачината на звукот и да се намали времето поминато во слушање музика. Сепак, таа признава дека, за жал, луѓето навистина сакаат да слушаат многу гласна музика.
Последиците ќе бидат видливи во староста
Дилард советува корисниците на слушалки да користат поставки или апликации на нивните паметни телефони кои им овозможуваат да го следат нивото на звукот. Во гласни средини, специјалните слушалки би можеле да помогнат да се избегне вклучување на музиката и да се намали бучавата во заднина, предлага таа. Советува да носите тампони за уши на бучни места, односно настани како што се концерти или ноќни клубови.
„Веројатно е многу забавно да се биде пред звучниците, но за долгорочното здравје тоа во никој случај не е добра идеја. Изложеноста на гласна музика во текот на вашиот живот има кумулативен ефект врз вашиот слух и еден ден, на пример, кога ќе наполните 67 години, би можеле да ја платите цената“.
Таа ги повика владите да се придржуваат до упатствата на СЗО за безбедно слушање музика, како што се следење и ограничување на нивоата на музика во одредени простории.
Истовремено, таа ги повика компаниите кои произведуваат уреди како паметни телефони да ги предупредат корисниците за прекумерната јачина на звукот и да ги вклучат родителите во процесот, кои ќе ја ограничат изложеноста на децата на гласна музика.
ОН проценуваат драстично зголемување на бројот на лица што страдаат од губење на слухот
Истражувањето е ограничено бидејќи вклучува различни методологии за проверка на јачината на звукот во различни студии, а ниту една од нив не била спроведена во ниту една од земјите со низок приход. Стивен Стансфелд, експерт за здравствени студии за бучавата на Универзитетот „Квин Мери“ во Лондон, кој не бил вклучен во студијата, вели дека тоа покажува оти потенцијалот за губење на слухот кај целата популација е многу висок.
Според податоците на СЗО, повеќе од 430 милиони луѓе, што е повеќе од 5% од светската популација, моментално страдаат од губење на слухот, што ги оневозможува да ги извршуваат секојдневните задачи. Агенцијата на ОН проценува дека оваа бројка ќе се искачи на 700 милиони до 2050 година.
912