Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Имам син од 7,5 години и проблем му е да оди в соба и сам да заспие, практично јас треба да го заспијам. Кога ќе го прашам што е проблемот, постојано ми вели: „Ми студи, не ја чувствувам твојата љубов кога не си во собата“. На прсти може да се изброи колку пати сам заспал, а за тоа му требале 1,5-2 часа во кои постојано повторувал: „Мамо, те сакам, добра ноќ, те гушкам“. Да напоменам дека до пред една година спиеше со нас, но сега имаме и 7-месечно бебе. Не е љубоморен, наклонет е кон бебето, а ние рамномерно го делиме времето поминато со двајцата. Како да му помогнам?

ОДГОВОР: Вашето дете до својата 6,5-годишна возраст спиело со вас, при што една година веќе се обидувате да го осамостоите да спие само. Колку е подолг периодот на воспоставување одредени навики, толку е потежок процесот на одвикнување. Во оваа ситуација детето не било научено во делот на спиењето да биде самостојно и сепарацијата од вас ја доживува стресно и вознемирувачки. Тоа го пролонгира сонот, како што велите 1,5-2 часа му се потребни за да заспие.

Во вакви ситуации најнапред треба да работите на целокупната независност и самостојност кај детето, постојано придружена со охрабрувачки глас во насока дека може сам, успева, способен е, одлично се снаоѓа сам, како и целокупна стимулација и ваша иницијативност да го оставите на спиење кај некој близок – баба, дедо, братучед, но и стимулација на самостојност како сам да пазари одредена намирница, да повика келнер во ресторан, да му дадете картичка да плати за одредена услуга.

Таквите ситуации треба да ги искористите за да ја потврдите неговата способност и успешност работите да ги прави сам. Потоа договорете колку време заедно би поминувале пред спиење, на пример, соодветно би било 20-30 мин. во кои ќе разговарате, ќе читате некоја книга додека тој е во кревет. Постојаната потреба од повторување одредени зборови како: „Мамо, те сакам, добра ноќ, те гушкам“ е само потреба да има контрола врз стравот и да се одложи сепарацијата.
Во тој дел обидете се да зрачите со сигурност и родителска самодоверба.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.