Македонија е земја во која мајката има право на породилно отсуство до девет месеци од животот на детето. Во многу земји породилното трае многу пократко. Така, на пример, во САД жените што работат во компании со 50 или повеќе вработени имаат право на 12 недели породилно отсуство. Сепак, тоа не значи дека тој период мора да им се плати, па голем дел од мајките одлучуваат да се вратат на работа и порано за да ги покријат трошоците за живот.

Рејчел Ларсен, директорка на компанија во Солт Лејк Сити, предупредува дека тоа е неправедно. Таа објави фотографија на која расплакана седи во автомобилот. Тоа бил првиот нејзин работен ден по породувањето.

– Ми беа потребни четири години за да соберам храброст и да ја споделам фотографијата. Дури и сега, тешко ми е кога ја гледам. Срамот околу подигнувањето на семејството и полното работно време е вистински. Оваа фотографија е направена на мојот прв работен ден откако ја родив мојата втора ќерка. Не бев подготвена. Мојата ќерка не беше подготвена. Не спиеше и беше нервозна. Се разбудив петпати претходната вечер за да ја надојам. Бев исцрпена. Како примарен извор на приходи за нашето семејство, бев принудена да се смирам, да се насмеам и да се вратам на работа.

Знам дека сум екстремно привилегирана. Имав можност да бидам делумно платена за време на породилното отсуство и имав можност да земам 12 недели. Имав работа што ја сакав и во неверојатна компанија со одлични шефови. Имав одлична градинка што можев да си ја дозволам со одлични наставници на кои им верував. Но, не бев подготвена.

Мора да направиме повеќе за да ги поддржиме родителите и семејствата. Можеби ми беа потребни четири години откако знаев дека нема да имам друго бебе за да ја споделам фотографијата. Но, мило ми е што имам храброст да ја кажам вистината сега – пишува Рејчел во нејзината објава.

Извор