Најдобри за овие деца се активностите што ги придвижуваат, поттикнуваат да читаат и ги стимулираат нивните умови. Подарете им разбирање, трпение, љубов и простор да растат и созреваат, вели Јелена Ѓиноска, дефектолог

Церебралната парализа или накратко ЦП е група на непрогресивни нарушувања на движењата и положбата, предизвикана од оштетување на мозокот кој е во развој. Церебралната парализа е предизвикана од абнормален развој или оштетување на деловите од мозокот кои ги контролираат движењето, рамнотежата и држењето на телото. Често причината е непозната, а се верува дека околу 2%  се должи на наследни генски причинители.

Најчесто се јавува во раното детство. Знаците и симптомите се различни кај различни луѓе. Често проблемите се: лоша координација, вкочанети мускули, слаби мускули, проблеми со голтање или зборување и потреси, меѓу другото. Исто така, детето може да има проблеми со сензација, визија и слух. Децата со церебрална парализа не се превртуваат во кревет, не седат, не ползат или не проодуваат во време вообичаено за возраста. Имаат недоволно развиени моторички вештини, намален или зголемен мускулен тонус, невообичаени и често непријатни положби на телото. Може да се фокусираат на локално ниво во околината, покажуваат сиромашна визуелна острина. Кога се помали од 3 години, може да покажат проблеми во контрола на главата и да држат непријатна позиција на главата, можни се напади и потреси.

Времето што му го посветувате на вашето дете е исклучително вредно. Најдобри за нив се активностите што ги придвижуваат, поттикнуваат да читаат и ги стимулираат нивните умови. Подарете им разбирање, трпение, љубов и простор да растат и созреваат. Тоа е најзначајно за нив во домашни услови, особено во предучилишна возраст и без оглед на нивните способности.

Активности

• Истегнување на мускулите се изведува со движење на рацете или нозете. Децата со ЦП имаат зголемен тонус и имаат тенденција да добијат тесни мускули. Затоа исклучително е важно да се врши дневно потегнување и задржување на рацете и нозете на детето.

• Зајакнување. Зајакнувањето се прави со вежби на кои се работи на одредена група мускули за да им се овозможи поддршка на телото и да се зголеми мускулната функција.

• Позиционирање. Телото да се стави во одредена позиција за подобра активност и учество на детето во активностите. Треба да се избегнува замор и фрустрација. Позиционирањето може да се направи на различни начини, вклучувајќи потпора, поставување перници, имобилизатори, инвалидска количка, каиши, ракување со технологија.

• Возење на специјално адаптиран трицикл може да биде возбудлива и одлична вежба. Од ова може да има корист секое дете со ЦП.

• Активности со вода: прскање, истурање вода од чаши, пливање со помош на тренер, физиотерапевт и помагала. Тоа може да биде одлична вежба и да помогне во подобрување на респираторните способности. Важно е да се има предвид дека студената вода може да го зголеми мускулниот тонус, но топлата вода често има релаксирачки ефект и помага во намалување на мускулниот тонус.

• Играње со играчки со различни бои и форми. На децата обично им се допаѓаат светли бои и големи форми. Понекогаш на децата со ЦП светлината може да им ги зајакне мускулите. Затоа имајте играчки и слики со најразлични бои, форми и големини за да се обидете да избегнете преголема стимулација.

• Музиката, исто така, е прекрасна и треба да ја користите великодушно. Покрај што е добра за умот, добра е и за стимулирање на говорот и комуникацијата. Охрабрете ги децата да се движат со музиката. На пример, нека застанат на нозе, нека плескаат со рацете и оставете ги да танцуваат на кој било начин. Може да ги охрабрите да танцуваат додека се во нивните инвалидски колички. Гласната или ненадејната музика често го надминува тонусот на мускулите, затоа имајте го предвид тоа кога работите со музика со вашето дете.

• Игри за подредување се добри за бруто и фино моторно контролирање. Најдобро е редовно да играте игри за сортирање затоа што повторното движење на мускулите помага да ги научите мозокот и мускулите да работат заедно. На пример, нека стават сини хартиени коцки во корпа оддесно, а црвени одлево.

• Тимска работа. Да се работи како дел од тим ја зголемува самодовербата без оглед на возраста. Детето може да работи и со братчето или сестричето. Може да се занимаваат со водење топка напред-назад, шутирање, ползење. Обидете се да го задржите расположението оптимистично и забавно за никој да не се чувствува обесхрабен.

• Уметноста и занаетчиството се одлични за децата со ЦП, а сè што треба да направите е да го одржувате реално за нивните потреби. Повеќето може сами да се приспособат, а вие да помагате доколку е потребно. Сечење, редење мониста на жица, боење и сликање се одлични за моторичките вештини.

• Одете на отворено, на прошетка и разговарајте за тоа што го гледате, слушате и чувствувате. Секогаш охрабрете ги говорот и дијалогот.

• Може да користите технологијата како компјутер или таблет со забавни апликации соодветни за возраста. Технологијата може да има многу важна улога во нивните животи, па затоа навикнувањето е добредојдено и корисно.