Колку пати годишно е нормално да се разболува детето во градинка?
Според обемниот научен преглед објавен во списанието „Клиникал микробиолоџи ривјус“, бројките за тоа колку пати едно дете може да се разболи во текот на годината се многу повисоки отколку што повеќето родители очекуваат.
Во текот на една година за нормално се смета детето да има:
- до 15 респираторни инфекции (настинки, кашлици, вируси)
- 2 гастроинтестинални заболувања (стомачни вируси)
- 1 до 2 инфекции што предизвикуваат исип
Тоа потенцијално значи по една болест секој месец во текот на цела година и според медицината, тоа е сосем нормален процес.
Зошто толку често се разболуваат децата?
Малите деца се особено подложни на инфекции бидејќи нивниот имунолошки систем сè уште се развива. Антителата што ги добиле од мајката за време на бременоста постепено исчезнуваат во текот на првата година од животот, па децата првпат во животот се среќаваат со повеќето вируси.
Кога сите овие фактори ќе се спојат во една просторија полна со други деца, бројките почнуваат да имаат смисла. Затоа, доколку ви се чини дека вашето дете минува повеќе време дома болно отколку во градинка, воопшто не грешите. Многу родители ги преиспитуваат своите одлуки во тој период бидејќи постојаните последователни инфекции изгледаат навистина исцрпувачки.
Тргнувањето во градинка на помала возраст значи посилен имунитет подоцна
Децата што рано започнуваат да посетуваат градинка стекнуваат имунитет на многу вообичаени инфекции порано во животот. Тоа значи дека тие се разболуваат значително поретко кога ќе тргнат во училиште, во споредба со децата што пред училишната возраст престојувале само дома.
Вакцинацијата останува еден од најделотворните начини да го заштитите вашето дете од сериозни заразни болести во текот на овие први години. Затоа, редовно следете го календарот за имунизација.
