Тешко е да се замисли денот кога чукањето на вратата од детската соба на вашето дете ќе стане неопходност, но тој ден ќе дојде, верувајте. Кога малите почнуваат да бараат поголема приватност, родителите имаат многу прашања. Дали е тоа сега? Кога е вистинското време да започнете да тропате? Прво, треба да знаете кога тропањето на вратите е соодветно, а кога не е. На пример, јасно е дека сигурно не би тропнале на вратата кога детето е доенче, но се поставува прашањето кога е добро време со оглед на тоа како растат децата. Д-р Лиза Строман, клинички психолог, споделува совети за тоа кога да се почне со тропање на вратите од собите, во зависност од возраста на детето:

Мали деца (1-3 години)

На оваа возраст родителите не треба да размислуваат за тропање на вратите пред да влезат.

-Овде нема потреба од приватност. Влегувањето во просторија без тропање е неопходно од безбедносни причини – советува таа.

Училишни деца (4-10 години)

Кога децата ќе достигнат училишна возраст, им треба малку повеќе личен простор.

-Иако можеби не бараат приватност на ист начин како постарите деца, можете да почнете да тропате пред да влезете во нивната соба, особено ако играат, читаат или имаат приватно време – советува д-р Строман.

Се разбира, безбедноста е секогаш на прво место, па ако се сомневате дека детето е повредено или се однесува опасно, можете да влезете без да тропнете.

Деца (11-12 години)

Во оваа фаза децата сакаат многу поголема приватност, па родителите треба да го обезбедат тоа секогаш кога е можно. Потребно е да тропате на вратата пред да влезете.

-Иако децата на оваа возраст бараат поголема приватност, сепак им треба вашето присуство и поддршка, дури и ако не сакаат да го признаат тоа – објаснува д-р Строман.

Тинејџери (13-18 години)

За време на тинејџерските години, исклучително е важно да се почитува приватноста на детето. Родителите секогаш треба да тропаат пред да влезат во собата на тинејџер.

-Тинејџерите го бараат својот идентитет, сакаат да градат нови врски и често во овој период сакаат простор надвор од семејството. Ова е фаза во која учиме меѓусебно почитување – почитување на правото на приватност додека одржуваме отворена комуникација – објаснува таа.

Зошто приватноста е важна во развојот на детето?

Обезбедувањето безбедна и соодветна приватност за децата е од клучно значење за нивниот развој на автономија и независност, нагласува д-р Келси Латимер, психолог. Како што децата откриваат кои се тие, умереното ниво на приватност е здраво, особено за време на адолесценцијата.

-Како што децата преминуваат во предадолесценција, тие почнуваат посилно да бараат приватност. Тие не сакаат нивните родители да го знаат секој детаљ за нивниот живот, а малку приватност може да биде здрава во тој процес – додава психологот.

Обезбедувањето приватност на децата ја развива нивната независност, самоконтрола, издржливост и емоционална сила, вели д-р Строман. Сепак, понекогаш, дозволувањето премногу приватност не е најдобрата опција, особено во ситуации кога тие се изложени на опасност.

Зошто некои родители мислат дека не треба да тропаат?

Нормално е да се запрашате дали е вистинското време да почнете да тропате на вратата од собата на вашето дете. Исто така, многу родители чувствуваат отпор кон тоа. Дејна Кампман, самохрана мајка на двајца тинејџери, признава дека на почетокот се двоумела.

-На почетокот давав отпор. Всушност, тоа е мојот дом.

Но, со текот на времето таа сфатила дека е важно да им се даде приватност на децата, дури и во нивниот дом.

Секој родител мора да си најде свој ритам бидејќи развојот на секое дете е различен.

-Не постои специфична возраст кога треба да почнете да тропате. Развојот ретко е црно-бел, зависи од детето, неговите потреби за приватност и безбедност кои се релевантни за неговата возраст – велат експертите.

Кои се последиците од игнорирањето на приватноста?

Непочитувањето на приватноста на детето може сериозно да го наруши родителскиот однос.

-Ако детето бара приватност, а вие не ја почитувате, довербата се губи – предупредува д-р Строман.

Игнорирањето на нивните потреби може да доведе до чувство на беспомошност, лутина и анксиозност. Ако родителот одбие да ги слуша границите на детето, тоа може да доведе до бунт или чувство дека детето нема збор.

Совети за градење доверба и комуникација

Без разлика дали сè уште не сте почнале да тропате или е време да го направите тоа, најважната лекција е да одржувате отворена и јасна комуникација со вашето дете. На овој начин секој се чувствува почитуван и врските остануваат силни.

Автор: Карина Шиждрак

Извор