Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Имам синче кое за три месеци ќе наполни пет години. Нашиот проблем е што тој до пред една недела не сакаше да ја тргнеме пелената. Јас пресеков и веќе цела недела спие без пелена и се има измокрено во креветче три пати. Секогаш пристапуваме смирено со сопругот, но забележувам дека тој воопшто не чувствувал дека се измочкал. Инаку, пелените за преку ден ги тргнавме на две и пол години, а грешката несвесно ја направивме што не ги тргнавме пелените и за ноќно спиење. Сега сме упорни, пред спиење се мочка и потоа го будам на три часа и го станувам на нокшир, ама забележувам дека тој спие и воопшто не чувствува дека мочка. Секогаш кога ќе стане сув, го пофалуваме. Ќе ве молам за совет и посочете ми каде грешиме?

ОДГОВОР: Кај многу деца на возраст од 3 до 5 години ноќното мокрење сѐ уште се смета за физиолошка појава. И ова е чест проблем со кој се соочуваат многу родители.

Може да постојат неколку причини зошто ова се случува. На пр., капацитетот на мочниот меур на вашето дете може едноставно да не е доволно голем за да ја задржи урината цела ноќ без да треба да се испразни.

Исто така, може да се случи хормонот кој го регулира производството на урина, кој се ослободува во текот на ноќта, и го намалува производството на урина и ни овозможува да спиеме цела ноќ, кај некои деца сѐ уште да не се произведува доволно ADH, што може да биде причина зошто не се буди. И секако дека кога спие цврсто, не е свесен дека треба да се разбуди за да оди во тоалет.

Ништо погрешно не правите, туку едноставно треба малку време за ова. Ограничете го внесот на течности пред спиење. Пред спиење, исто така, правете ги сите ритуали, како миење на лицето, забите и одење во тоалет. И продолжете со будењето (станувањето за ставање на нокшир). Ова може да му стане навика, па сам да се буди кога ќе има потреба.

Важно е да бидете трпеливи со вашето дете и да не се вознемирувате, продолжете со истото и не враќајте ги пелените. Секое дете се развива со свое темпо, па и ова кај некои деца оди побргу, кај некои побавно. Доколку продолжи ноќното мокрење, би било добро да се обратите кај вашиот педијатар за понатамошни инструкции и помош.

Доколку ви е потребна дополнителна помош за како да постапувате, како и за развојот на вашите дете можете да закажете родителско советување и психоедукација на sovetuvanje@gmail.com

Одговара: Билјана Манасова-Јовановиќ, дефектолог и психотерапевт; Психотерапија и советување 
е-пошта: sovetuvanje@gmail.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.