Горештините и бременоста: како да се заштитите и себеси и вашето бебе?
Летата стануваат сè подолги и потопли и изгледа дека такви и ќе останат. Ако сте бремена или планирате бременост, топлината е нешто на што морате да обрнете внимание. Новата анализа на организацијата „Клајмет централ“ покажува колку екстремната горештина може да влијае врз бременоста, но и како да се заштитите.
Истражувањето го опфатило периодот од 2020 до 2024 година, анализирајќи податоци од 940 града во 247 земји и региони. Научниците ги истражувале т.н. „ризични денови за бремените жени“, денови кога високите температури ја зголемуваат веројатноста за компликации во бременоста.
Заклучоците се загрижувачки: речиси една третина од земјите имале најмалку еден месец повеќе опасно жешки денови во споредба со претходните години. Во некои делови од светот тој број дури се удвоил, што е директен показател за климатските промени.
Дури и еден ден со екстремна жештина може да го зголеми ризикот од сериозни компликации како висок крвен притисок, гестациски дијабетес, хоспитализација, па дури и предвремено породување.
Што можат да направат бремените жени?
Добрата вест е дека постојат едноставни начини за заштита. Еве што може да помогне:
Пијте доволно вода – Носете шише со себе и пијте често, дури и кога не чувствувате жед.
Избегнувајте излегување во најжешкиот дел од денот – Планирајте ги прошетките и обврските рано наутро или навечер.
Носете лесна облека – Одберете светли бои и материјали што дишат.
Разладете се дома – Вентилатори, клима-уреди, ладни тушеви или влажни крпи на вратот можат многу да помогнат.
Препознајте ги знаците на исцрпеност поради горештините – Ако почувствувате вртоглавица, мачнина, забрзано чукање на срцето или претерано потење, веднаш застанете и побарајте ладно место.
Слушајте го своето тело и одморете се кога е потребно
Бременоста бара да се слуша сопственото тело. Кога температурите се високи, тоа станува уште поважно.
Поголемиот дел од бременостите поминуваат без компликации, дури и во време на горештини. Со малку внимание и неколку едноставни чекори, може да се чувствувате сигурно и пријатно.
