Децата не се секогаш љубезни кога станува збор за примањето подароци, а некои родители може да се изнервираат додека го гледаат своето дете како го одвиткува роденденскиот подарок пред гостите. Што ако детето отвори нешто што не му се допаѓа и јавно го изрази своето незадоволство поради тоа? Потешко е да се очекува од помалите деца да се однесуваат со одредена дискреција за нивните негативни чувства. Сепак, ова може да биде можност да ги научите децата да прифаќаат подароци, дури и ако не им се допаѓаат, со одредена благодарност.

Психологот Канг Ли од Универзитетот во Торонто истакнал дека децата можеби имаат едноставно разбирање за концептот на благодарност и морален развој уште на три години. Така, да ги обучите да бидат љубезни на толку рана возраст може да има доживотен исход и резултат. Еве неколку начини со кои ќе им помогнете на децата да разберат зошто е важно да се биде љубезен:

Разговарајте зошто добиваат подароци

Објаснете им ја на децата причината за подарувањето и нагласете дека тие се среќни што ги имаат овие специјални подароци бидејќи не сите деца добиваат роденденски, божиќни или велигденски подароци. Не правете да се чувствуваат дека треба да имаат право на подарок бидејќи тоа е посебен ден. Наместо тоа, помогнете им да ја разберат вредноста на подарувањето за да го ценат давателот повеќе отколку предметот, без разлика што има во кутијата. Мајката Шејла Хансон напишала дека им објаснила на 5-годишниот син и 3-годишната ќерка оти подароците се всушност мисли. Таа рекла дека кога некој ќе ти даде подарок, тоа значи дека размислува за тебе. Значи, не е важно што е подарокот, бидејќи најважното нешто што треба да се запамети е дека подарокот е начин на кој таа личност го покажува своето внимание.

Вклучете го вашето дете во процесите на подарување

Обидете се да ги вклучите децата во процесот на давање подароци. На пример, нека одберат подарок за следниот член на семејството кој ќе го слави својот роденден и потоа нека учествуваат во завиткувањето на подарокот. Тие лично нека го дадат подарокот за да го доживеат возбудливото чувство кога ќе им се каже: „Ти благодарам!“ од роднина или пријател.

Вежбајте како да прифаќате подароци

Понекогаш подобро е да ги научите децата на соодветен одговор. Ако ги научат точните фрази што треба да ги кажат, тоа ќе ги спаси сите од срам. Со вежбање, родителите исто така можат да играат улоги со децата и да смислат сценарија што може да им помогнат да се подготват за неочекуваното. Родителите може да ги научат своите деца на соодветен одговор во случај да добијат подарок што не им се допаѓа. Потсетете ги дискретно да ви кажат за тоа, а потоа понудете им да разговарате за тоа подоцна, приватно. Како засилување, родителите не треба да заборават да го пофалат детето дека се однесува соодветно.

Поставете пример

Експертот за детски развој Мари Хартвел-Вокер истакнува дека би било невозможно да се научат децата да бидат благодарни ако тоа не можат да го видат од нивните родители. Таа вели дека ако децата ја видат нивната мајка или татко како вообичаено се заблагодаруваат или демонстрираат љубезност, тие исто така ќе ги прифатат истите вредности.

Автор: Лили Скот

Извор