Редовните семејни оброци можат да помогнат во стекнувањето и одржувањето на прехранбените навики. Возрасните што имаат редовни оброци, полесно ја регулираат телесната маса и имаат поздрав избор на храна. Можете однапред да подготвите еден оброк кој може да го јадат сите членови, па со тоа ќе избегнете готвење набрзина, што често подразбира многу повеќе работа и стрес.

Благосостојбата на заедничките семејни оброци е поголема како што растат децата. Постарите деца и адолесцентите кои имаат три или повеќе семејни оброци во неделата имаат 24% поголема веројатност дека ќе јадат здрава храна. Ова се неколку совети што да направите за вашето семејство кога се во прашање здравите оброци.

Семејните оброци мора да станат приоритет

Барем еден оброк во денот треба да го консумирате заедно. Ако и тоа во почетокот е нереално, поставете цел и имајте барем три заеднички оброци неделно. Студиите покажуваат дека три или повеќе семејни оброци неделно најмногу влијаат врз добрите прехранбени навики. Ако ви се чини дека заедничката семејна вечера е невозможна мисија, обидете се заеднички да јадете во друг дел од денот.

Моделирајте здрави прехранбени навики

Уште додека се мали изложете ги децата на различен избор на здрава храна и соодветно однесување во текот на оброкот. Бебињата ги имитираат своите најмили, па најдобро е на сите да им се послужува истата храна што е можно почесто. Запомнете дека децата ја гледаат и онаа помалку здрава храна што ја консумирате, па бидете свесни и внимавајте која храна ја ставате на маса.

Послужувајте разновидна храна

Бебињата и возрасните учат да ја сакаат храната кога доволно долго гледаат дека ја јадат лицата со кои се опкружени. Доволно е само да бидат изложени на такви ситуации. Така ќе учат да прифаќаат нови јадења и здрави намирници. Експериментирајте со храната, гответе на пареа или послужете ја свежа, а може да испробате и различни комбинации на вкусови кои можат да станат дел од вашето мени.

Не присилувајте ги децата да пробуваат одредена храна

Истражувањата покажуваат дека притисокот врз децата да јадат здрава храна, како зеленчукот, може да предизвика спротивен ефект. Оставете го детето да одбере што сака да јаде од храната што ќе ја ставите на маса. Ваша е одлуката каква храна ќе понудите, кога ќе ја подготвите и како. Вашето дете ќе одлучи колку ќе јаде и дали ќе јаде. Бидете трпеливи.

Бидете креативни

Она што можете да го направите, а на децата им е привлечно, е својата креативност да ја пренесете и во кујната и на чиниите. Можете од зеленчук да направите интересни креации, на пример, најдрагите анимирани ликови да ги направите од намирници и да ги декорирате оброците така што ќе им станат примамливи.

На што треба да внимавате кога го осмислувате летното мени за семејството:

– Трудете се секогаш да смислите неделно мени бидејќи така ќе ви биде полесно да ги поднесете обврските, кои некогаш се немилосрдни. Сабота и недела искористете ги за купување намирници за да имате сè што ви е потребно во фрижидерот. Така ќе бидете и побрзи во подготовката. Одберете јадења во кои ќе внесете многу свеж и сезонски зеленчук.

– Не плашете се јадењата што вообичаено ги подготвувате за вечера да ги подготвите за појадок и обратно. Не постои правило според кое не можете, на пример, омлет со зеленчук да подготвите за појадок.

– Составете план на оброци и користете го како водич во одржувањето здрави прехранбени навики. Ако почувствувате инспирација и посакате нешто да промените, направете го тоа. Најмногу обрнете внимание на вашиот животен стил, па согласно тоа направете и план за исхрана што најмногу ќе ви одговара.

Во секој случај, треба да имате на ум и паметно да купувате намирници. Експертите советуваат да се јаде најмногу свежа салата од зеленчуци, која е богата со витамини и е силен сојузник на нашиот организам во одбрана од многу болести.