Респираторните болести и настинките се зголемуваат во текот на зимските месеци. Новороденчињата се „ранлива популација“, што значи дека се изложени на зголемен ризик од здравствени компликации и сериозни случаи на вообичаени болести, настинки и грип, објаснува д-р Валентина Рае Еспозито, лекар во Одделот за општа педијатрија во Бостонската детска болница. Треските кај бебињата под 2 месеци се исто така медицински итни случаи бидејќи тие немаат заштита од вакцини и се изложени на поголем ризик од сериозни бактериски инфекции, вели таа.

Ако сте под стрес бидејќи сакате да го заштитите вашето бебе да не се разболи, не сте сами. Педијатрите поминуваат многу време давајќи им совети на родителите на малите бебиња во овој период од годината, кога патувањата и големите собири се дел од секојдневието. Експертите даваат совети:

Почитувајте го „златното правило“

Ако некој е симптоматичен – ако има активна температура, кашлица, кивање, повраќање или дијареја – не треба да биде покрај вашето новороденче, вели Еспозито.

Поставете граници

„Никогаш не треба да чувствувате вина за границите што ќе ги одберете да ги спроведете кон вашите деца“, вели Еспозито. Она што е добро за вашето семејство може да биде различно од она што е добро за друго семејство. И тоа е во ред. Се разбира, сето тоа е полесно да се каже отколку да се направи – особено околу празниците, кога сите сакаат да го запознаат новото бебе.

Ако имате партнер, разговарајте заедно за овие работи

Се чувствувате непријатно за поставувањето граници? Обвинете го вашиот педијатар, советува д-р Кејти Локвуд, педијатар од Флауертаун, Пенсилванија. „Може да биде навистина тешко да ги имате тие бариери со саканите, додека се обидувате да го заштитите вашето малечко“, вели таа, па само нека знаат дека едноставно го следите советот на докторот на вашето бебе.

Проверете дали пријателите и семејството се во тек со примањето на вакцините

Пред бебињата сами да се квалификуваат за добивање на соодветните вакцини, „ние ги заштитуваме со заштитување на луѓето околу нив“, потсетува Еспозито. Возрасните и децата што ќе бидат покрај бебињата треба да ги имаат примено пропишаните вакцини

Мијте ги рацете како лекар – и научете ги и другите да го прават истото

„Има многу студии кои покажуваат дека луѓето не ги мијат рацете толку добро како што треба“, вели Еспозито. Доброто миење на рацете подразбира чистење на рацете додека ја испеете, на пример, песната „Среќен роденден“ барем двапати. „Исто така, им кажувам на луѓето, особено ако држат бебе, да размислуваат за себе како да се хирург кој се подготвува да се исчисти за операција. Ги триеме рацете до лактите“, вели таа.

Понесете неколку маски

Иако не е неопходно секој што има можност да го држи вашето бебе да носи маска, Еспозито вели дека ако некој има каков било симптом, па дури и благ, тогаш треба да стави маска. Со новороденчињата, секогаш треба да бидете претпазливи, па ако вие, како родител, се чувствувате поудобно кога некој што е во близина на вашето бебе носи маска – тогаш имате целосно право да побарате да го стори тоа.

Размислете за промена на облеката

Дали семејството патувало надвор од државата? Постарите деца се враќаат од празнични настани? Размислете за менување на облеката пред да го држите вашето бебе в раце, бидејќи на облеката може да има бактерии кои можат да се прошират на бебето преку секој што го држи или допира.

Ако се разболите додека доите, продолжете да доите

Болни сте додека доите? Добра вест: антителата што ги создавате за да се борите со сопствената респираторна болест ќе бидат пренесени на вашето доенче. Иако не сакате да му кашлате на бебето, а можеби ќе сакате и да носите маска, да го зачестите миењето на рацете, ако продолжите да го доите бебето може да ја намалите шансата тоа да ја добие болеста што ја имате.

Стремете се кон едноставност

„По три месеци возраст бебињата се помалку ранливи“. Сите педијатри препорачуваат работите да бидат едноставни оваа сезона – помалку луѓе, помалку планови, а со тоа и пониски нивоа на стрес и повеќе време за да се поврзете со новиот член на семејството.

Автор: Кеси Шортслив

Извор