Младите иноватори почнаа да ги развиваат своите идеи со помош на ментори од „Телеком“

На отворениот повик до млади иноватори за инклузија на деца и лица со попреченост што во октомври го објавија УНИЦЕФ и Фондацијата „Телеком за Македонија“ се пријавија 50 тима од 220 млади на возраст од 14 до 24 години.
Од пријавените избрани се 10 тимa – финалисти кои ќе работат на предизвикот: Како може дигиталната технологија да придонесе за поактивно вклучување на децата и младите со попреченост во образованието и во секојдневниот живот.

Тимовите почнаа да работат на предработилници што се одржаа на 29 и 30 ноември, каде што се запознаа со основите на асистивната технологија и дигитална инклузија и заедно со ментори од „Македонски телеком“ работеа на формулирање на своите идеи, кои ќе се развиваат во наредните две недели.
На работилниците, кои ќе се случуваат од 13 до 15 декември 2019, ќе бидат избрани најдобрите пет идеи и ќе бидат наградени со финансиски средства и со менторска поддршка.
Во јуни 2020 година двете најдобри решенија од финалето во земјата ќе влезат во светскиот избор на глобалниот младински предизвик „Generation Unlimited 2019/20“ што се одвива во над 40 земји во светот.

Фондацијата „Телеком за Македонија“ и УНИЦЕФ објавија партнерство во јуни годинава, мотивирани од потребата за намалување на дигиталниот јаз и користење на технологијата за еднаква вклученост на децата и лицата со попреченост во дигиталното општество.
Младинскиот предизвик на УНИЦЕФ и на Фондацијата „Телеком за Македонија“ се реализира во соработка со СмартАп и Македонскиот извиднички сојуз.