„Инстаграм“ е најопасната друштвена мрежа за децата бидејќи се дошло до сознание дека најмногу им одговара на педофилите. И „Фејсбук“ не е безопасен, но во моментов заостанува во споредба со „Инстаграм“.

Ниту една друштвена мрежа не е безбедна, но истражувањето на Британското здружение за заштита на деца од насилство покажало дека „Инстаграм“ е најопасен. Водичите на студијата предупредуваат дека оваа друштвена мрежа најмногу им оди во корист на педофилите, па така полицијата во Англија и во Велс во полугодишен период забележала речиси 2 илјади инциденти со сексуална конотација во кои биле вклучени деца.

Полициските извештаи откриле дека 7 од 10 жртви се девојчиња, во просек од 12 до 15 години. Се случувало во замка да паднат и помлади кориснички на „Инстаграм“.

Од Националната агенција за борба против криминалот навеле дека платформите што ги користат децата и младите мора да имаат механизми за спречување на сомнителното и опасно однесување на интернет, Меѓутоа, Питер Ванлес, директор за Здружението за заштита на деца од насилство, вели дека друштвените мрежи не ги почитуваат правилата.

– Податоците покажуваат дека децата не можат да бидат безбедни на друштвените мрежи. Не смееме да чекаме да се случи следна трагедија. Компаниите мора да реагираат– предупредува Ванлес.