Првите месеци од училишната година секогаш се стресни за првачињата. Не се сите во состојба веднаш да се приспособат на новиот режим и брзо да склопат пријателства со другите деца. Затоа, најдобро е да им помогнете да се зближат и да се запознаат низ игра. Еве неколку такви игри, одлични за почетокот на учебната година…

Освен што ќе им помогнат на децата да се запознаат и побрзо да ги запомнат имињата, овие игри имаат и други добри страни:

– Ја развиваат способноста за брзо помнење;
– Ги развиваат комуникациските вештини кај децата;
– Може да се играат како загревање;
– Наставникот ќе биде во состојба навреме да открие срамежливи и тивки деца;
– Ефикасен и едноставен начин за создавање уникатна заедница во одделението;
– Овие игри не се погодни само за на училиште – можете да ги користите и во летните кампови и на детските роденденски забави.

Игра 1: Да кампуваме

Лесен начин да се запомни името на другарчето. Задачата на секое дете е да стане и да го каже своето име и предмет поврзан со училиштето, а кој почнува на истата буква како неговото име. На пример: „Се викам Милица и ќе земам математика (учебник)“.

Важно: Станува збор за игра за меморија и поврзување. Детето има право да го именува само оној предмет чие име почнува со истата буква како и неговото име.

Играта може да се игра неколку пати во текот на првиот месец. Менувајте ја темата секојпат – одиме во библиотека, во парк итн.

Игра 2: Топка

Сите деца се во голем круг. Топката му се дава на детето што е прво напишано во дневникот. Задача: јасно да го изговори своето име + име на животно со кое се поврзува + топката да ја проследи до детето што е до него, во насока на движењето на стрелките од часовникот. Играта продолжува сè додека топката не се врати во рацете на првото дете.

Игра 3: Магична кутија

Имињата на сите деца во одделението треба да се напишат на ливчиња хартија. Измешајте ги ливчињата и ставете ги во кутија. Децата доаѓаат по ред и ги извлекуваат ливчињата. Кога ќе го извлечат ливчето, задача на ученикот е да се сети и да го покаже другарчето со тоа име.

Игра 4: Азбука на запознавање

Наставникот ги изговара буквите од азбуката. Децата чии имињата почнуваат со таа буква одговараат на 5 идентични прашања:

Твоето име.
Презиме.
Омилено јадење.
Омилен цртан филм.
Што правиш во слободно време?

Игра 5: Спротивности

Оваа игра најдобро би било да се игра во училишниот двор. Сите деца се редат во една линија. Наставникот се оддалечува од нив 3-4 метри и им поставува прашања. Сите деца што одговараат со „да“ одат чекор напред. Ако одговорот е не – стојат мирно.

Прашања што можете да ги поставите:

Кој од вас има 7 години?
Кој е роден во есен?
Кој има сестра?
Кој има куче дома?
Кој сака да танцува?
Кој може да скока?
Кој тренира фудбал?