Играта со кукли е многу повеќе од обична забава. Таа е нежен начин за вашето дете да ги истражи силните емоции и да научи како да се справува со нив. Преку ликот на куклата, на детето му е полесно да зборува за чувства како што се лутината, љубомората или стравот бидејќи тоа не се „негови“ чувства во моментот, туку чувства на куклата.

Што ви е потребно за оваа активност?

Можете да користите каква било кукла, кадифена играчка, па дури и да направите своја. Изработката на кукли е прекрасна креативна активност која дополнително ќе ве зближи.

Идеи за рачно изработени кукли:

• Весели чорапчиња: Искористете стар чорап и нацртајте му очи со маркер или сошијте копчиња. Волница може да се искористи како коса.
• Хартиени кеси: Обичните хартиени кеси можат да станат кукли што се ставаат на рака. Детето може самото да нацрта лице на нив.
• Емотивни ликови: Направете различни кукли за различни емоции – една која е секогаш среќна, една која понекогаш е лута и една која е срамежлива.

Како низ игра да ги учиме емоциите?

• Следете го детето: Дозволете му на детето да ја води играта. Тоа ќе биде пресреќно кога ќе види дека и вие „влегувате во ликот“.
• Внесете чувства во приказната: Ако куклите танцуваат, едната може да се почувствува тажна бидејќи не знае толку добро да танцува како другите. Прашајте го детето: „Што мислиш, како се чувствува сега оваа кукла? Што треба да направиме за да ѝ помогнеме?“
• Разликувајте го чувството од однесувањето: Ако куклата во играта удри друга кукла, искористете го моментот за поука: „Во ред е куклата да биде лута, но не е во ред да удира. Што друго може да направи кога е лута?“
• Споделете ваши искуства: Раскажете му на детето за времето кога вие сте се чувствувале на сличен начин. Тоа ќе му помогне да сфати дека сите емоции се нормални.

Златна порака: „Сите чувства се во ред, но не секој начин на однесување е прифатлив.“

Приспособување според возраста

За помалите дечиња: Малите деца можат сериозно да ги доживеат емоциите на куклите. Ако куклата вика или е лута, детето може да се вознемири. Бидете нежни, гушнете го и прекинете ја играта ако повеќе не е забавна.

За поголемите деца: Тие можат да смислат цела претстава за емоциите. Можете дури и да ги снимите со телефон или таблет, а потоа заедно да го гледате нивниот „филм за чувствата“.

Играта со кукли е безбедно место каде што детето вежба за вистинскиот свет. Уживајте во овие заеднички моменти на креативност и нежност!

Извор