Неважно дали се од улица или од богато семејство, сите деца се исти – најубавите и најневините нешта на светот. Да ги сакаме и да се грижиме за нив, вели македонскиот фотограф Горан Анастасовски, претставувајќи ја својата најнова колекција фотографии од деца, деновиве објавена на Боред панда, еден од водечките светски портали за поп-култура и уметност.
Оваа колекција на Анастасовски е патување до насолзените детски очи, до широката насмевка, измачканите усти, до црното под ноктите… Сите различни, а сите исти.

– Децата се деца и тие се најубавото нешто на светот. Ги направив овие фотографии како доказ дека сите деца се убави и слатки – вели Атанасовски за „Боред панда“.

Горан Анастасовски

Фотографиите на Атанасовски последните години беа дел и од британскиот „Дејли мејл“, американскиот Еј-би-си, Инсајдер, Нешнл џиографик… До нив објективот на Анастасовски ги „носеше“ нашите природни убавини, градските светла и сенки, а најчесто животните од скопската Зоолошка градина.

– Единствено нешто што е посимпатично од животни-бебиња е гушнати животни-бебиња. Повеќе од 13 години камерата на фотографот Горан Анастасовски е свртена кон нежните портрети на животните – напиша „Инсајдер“ пред неколку месеци, а Еј-би-си, фотосеријалите на Атанасовски од скопската ЗОО ги стави под заглавјето – Како една зоолошка градина ги рефлектира личностите на животните.

– Фотографирањето животни е мојата најголема страст и ако успеам да направам барем еден човек повеќе да се грижи за животните, сум ја постигнал целта. Со секоја фотографија што ја снимам целта ми е да ја доловам не само убавината на животното, туку и хуманоста на животните и нивната способност да бидат грижливи и да искажуваат љубов – вели Анастасовски.

Британскиот „Дејли мејл“ го нарече кралот на фотографијата, а француски „Фигаро“ ги стави неговите леопарди на својата „дуплерица“.

Ако не го најдете зад фотоапаратот по скопските сокаци, побарајте го во скопската зоолошка, каде што често ги прави фотографиите.