Како родители, најдобриот начин на кој можете да му помогнете на вашето дете е со обрнување внимание на знаците дека можеби има тешкотии на одредено поле.
Новите почетоци, особено новата учебна година, и за децата, но и за родителите значи запознавање нови луѓе, воспоставување нови рутини и изнаоѓање начини да го направите сето тоа во рок од еден ден.
Ова дополнително е тешко и комплицирано ако имате дете-интроверт.
Мери Борис, терапевт, нуди неколку совети како да препознаете кога интровертноста може да биде знак за нешто поголемо и како најдобро да го поддржите интровертното дете.
Разбирање на интровертноста
Бидејќи интровертноста, социјалната анксиозност и срамежливоста може да изгледаат слично, имањето јасни дефиниции за секоја од овие состојби е првиот чекор за процена на најдобрите начини за поддршка на детето.
Според Американската психолошка асоцијација, интровертноста кај децата, како и кај возрасните, може да се манифестира како желба да си играат сами или да работат самостојно (и да уживаат во тоа).
– Најголемата разлика помеѓу интровертноста и социјалната анксиозност се сведува на задоволство. Децата можат да бидат многу добро приспособени и задоволни со интровертен темперамент, наспроти социјалната анксиозност што предизвикува нарушување на нивната благосостојба – објаснува Борис.
Дали е интровертност или социјална анксиозност?
Некои клучни разлики на кои треба да внимавате кога проценувате дали вашето дете е интровертно или се движи кон социјалната анксиозност се сведува на тоа како игра детето.
– На интровертното дете му оди добро со неколку пријатели, често претпочита игра која е поиндивидуална и може да се чувствува уморно по големи групни социјални настани или почесто да има потреба од одмор по училиште или дружба. Алтернативно, детето со социјална анксиозност има желба да учествува или да формира повеќе пријателства, но е преоптоварено и се чувствува како да не може – објаснува Мери.
Возраста, исто така, може да игра улога во тоа како се претставува интровертноста. За малите деца, однесувањето како криење зад родител и избегнување контакт со очи може да бидат клучни знаци, според Мери. За постарите деца, некои манири се вообичаени како на пример избегнување учество во училишни активности или гледање други како играат отстрана. Забелешката, како што беше споменато претходно, е дека децата уживаат во тоа што се сами наместо да копнеат да бидат вклучени во играта со другите.
Според Мери, должината на однесувањето може да им помогне на родителите да направат разлика помеѓу интровертност, социјална анксиозност или трема пред почетокот на училишната година.
Доколку овие симптоми не исчезнат, барањето медицинска помош е нешто за кое родителите треба да размислат. Некои знаци дека станува збор за повеќе од трема се нарушување во спиењето, анксиозност или депресија, како и огромни емоционални испади. Сите овие се знаци дека е потребна дополнителна поддршка.
Како да му помогнете на детето-интроверт да се дружи?
Како родители, најдобриот начин на кој можете да му помогнете на вашето дете е да обрнете внимание на знаците дека нешто го мачи. Интровертноста не е карактерна маана. Наместо тоа, се работи за забележување на односот на вашето дете со интровертноста.
– Црвено знаме дека детето би можело да биде емоционално погодено од борбата за стекнување пријатели би било ако забележите сеприсутна промена во неговото расположение, ако именува и вербализира чувство на осаменост или ако вашето дете не е прифатено или е малтретирано од други – објаснува Мери.
Според неа, ако се обидувате да му помогнете на вашето дете да се движи низ својата интровертност и да се дружи, треба:
- Да избегнувате да вршите притисок врз вашето дете брзо да создава пријатели;
- Да му кажувате приказни за периодот кога вие сте се бореле со стекнување пријатели и што сте правеле;
- Да му закажете игра и дружба во вашиот дом за околината да му е позната;
Ако на вашето дете му е тешко на училиште, соработувајте со наставникот за да создадете најдобро сценарио за вашето дете.
– Најважна е комуникацијата. Важно е да ги известите наставниците дека ученикот е интровертен – вели Мери.
912