Постојат различни мислења за тоа зошто жените имаат мајчински инстинкт. Додека некои мислат дека ова е природен инстинкт за воспитување и дека ни е биолошки даден, други веруваат дека желбата за воспитување дете доаѓа преку искуството. Постои мислење дека социјалниот притисок е тој што им кажува на жените дека треба да имаат мајчински инстинкт, правејќи ги да се чувствуваат лошо ако немаат.
Но, без разлика на мислењата, во текот на бременоста се случуваат хормонални промени во телото кои ја подготвуваат жената и го будат природниот инстинкт за мајчинство. Дали ова секогаш се случува, е сосема друго прашање. Бидејќи не постои единствена дефиниција за мајчинскиот инстинкт, жените веруваат дека ќе се поврзат со своето бебе веднаш по раѓањето. Чувствуваат дека им треба водич да им објасни сè за мајчинството и дека мајчинскиот инстинкт им е даден на сите, но не и ним.
Окситоцинот игра важна улога
Иако се поставува прашањето дали мајчинскиот инстинкт доаѓа пред бременоста, она што не се дискутира е дека хормоните создаваат промени во телото за да воспостават врска помеѓу мајката и бебето по раѓањето. Според една студија од 2007 година, хормонот окситоцин создава желба кај мајките да се поврзат со своето бебе. Нивото на окситоцин постојано се зголемува во текот на бременоста додека не го достигне својот врв по раѓањето на бебето. Од тој момент, окситоцинот им помага на мајките да градат силни врски со своите бебиња и ги подготвува да сакаат да ги хранат и негуваат.
Рецепторите на окситоцин во мозокот го регулираат однесувањето на мајката, така што можеме да кажеме дека овој хормон предизвикува „мајчинско однесување“.
Мозокот на мајката поминува низ промени
Кога жената ќе забремени, нејзиниот мозок поминува низ промени кои ќе го разбудат нејзиниот природен инстинкт за мајчинство. Од моментот кога ќе забремени, сивата материја во нејзиниот мозок станува „пофокусирана“. Областите на мозокот кои се одговорни за емпатија и социјална интеракција стануваат сѐ поактивни.
Областа на мозокот што овозможува слободен проток на окситоцин се нарекува амигдала. За време на бременоста и доењето, окситоцинот брзо се движи низ амигдалата, што помага да се зајакне врската помеѓу мајката и бебето. Она што сè уште не е познато е дали мозокот на мајката по породувањето се враќа во состојбата пред бременоста.
Ако сте пораснале со мали бебиња
Некои жени имаат желба да станат мајки уште од мали нозе, па се верува дека веќе почнале да развиваат мајчински инстинкт. Се смета дека опкруженоста со бебиња, со кои жените се во контакт, може да влијае врз нивниот мајчински инстинкт бидејќи престојот во близина на бебето може да го промени нивото на хормоните. Дополнително, животните искуства и сопственото детство можат да влијаат врз природниот мајчински инстинкт.
Како резултат на тоа, жените што се поддржани од околината имаат поизразен мајчински инстинкт и обратно, па тоа би можело да биде причина зошто природниот инстинкт за мајчинство кај некои жени е поизразен отколку кај други.
912