Породувањето во вода е еден од најпознатите алтернативни методи на породување, кој е сè попопуларен во странство. Овој метод подразбира мајката да биде делумно потопена во топла вода за време на породувањето. Сепак, пред мајките да се одлучат за овој метод и да не одат во болница, гинекологот Сакси Гоел истакнува неколку предности и недостатоци на овој вид породување.

Предности на породувањето во вода

Како најголема предност на породувањето во вода д-р Гоел ја посочува намалената болка во однос на нормалното породување. Причината за тоа е што мускулите се помалку напнати поради релаксирачкиот ефект на топлата вода. Поради ова, ваквото породување може да биде попријатно и да бара помалку медицински техники за ублажување на болката, истакнува гинекологот.

Таа додава дека овој тип породување е многу попријатен. „Мајките кои избираат да се породат во вода можат полесно да се движат и да најдат поза што повеќе им одговара за време на породувањето“, вели д-р Гоел, додавајќи дека тоа поттикнува поспонтан и динамичен процес на породување.

Со породувањето во вода постои помала веројатност за траума на перинеумот. За време на породувањето во вода, перинеумот станува поеластичен и помалку подложен на повреди, што на крајот може да ѝ помогне на мајката побрзо да закрепне по породувањето. Генерално, објаснува гинекологот, породувањето во вода помага за намалување на напнатоста и тегобите.

Недостатоци на породувањето во вода

Покрај многуте предности поради кои овој тип породување изгледа како совршена опција, гинекологот ги посочува и негативните страни кои мора да се земат предвид. Една од нив е можниот ризик од инфекција. Д-р Гоел објаснува дека топлата вода може да содржи бактерии, зголемувајќи го ризикот од инфекција за мајката и за бебето.

А тука е и проблемот со потешка контрола на ситуацијата бидејќи е многу потешко да се следат мајката и детето при породувањето во вода. „Може да биде тешко за лекарите внимателно да го следат срцевиот ритам на фетусот и виталните знаци на мајката, ако уредите за следење не работат правилно во водата“, објаснува таа.

Д-р Гоел не го препорачува овој тип на породување за жени кои имаат одредени медицински состојби или бремености со висок ризик. Таа додава дека трудниците треба да разговараат со своите лекари за да утврдат дали породувањето во вода е безбедно и соодветно за нивната ситуација. Исто така, во случај на можни компликации, постои многу поголем ризик за мајките и бебињата доколку не се породат во болница, каде што се обезбедува максимална грижа.

Извор