Постојат многу заблуди за аутизмот, особено кога станува збор за малите деца. Анонимни родители споделуваат работи што би сакале другите луѓе да ги разберат, а се поврзани со аутизмот и аутистичните деца.

– Мојата ќерка може да слушне и да види како се однесувате со неа. Невербалното однесување не ја намалува нејзината хуманост. Таа е човек со чувства и емоции како тебе и како мене – Викторија Р.

– Дури и децата што не зборуваат можат да слушнаат. Не зборувајте со мене преку моето дете како да не е присутно, особено ако „сочувствително“ ми кажете дека сум светица што се справувам со оваа ситуација секој ден. Јас не сум светица. Јас сум мајка. Јас сум родител. А моето дете те слуша и разбира дека зборуваш за него како да е товар – Кели Д.

– Едно лице со аутизам е само едно лице со аутизам. Аутизмот не е ист за секое лице со оваа дијагноза – Венди П.

– Секоја личност е различна. Ве молам, не потценувајте го моето дете поради нешто што сте слушнале или прочитале – Џени Ц.

– Постои широк спектар на различни луѓе кои само сакаат да бидат третирани љубезно, со почит и како во случајот со моето петгодишно девојче, со трпение. Ниту една казна или викање нема да ја научи да се однесува подобро – Алисија В.

– Кога ќе ви објаснам дека мојот син има аутизам, не гледајте ме како детето да ми е товар и како да ми е многу тешко. Моето дете е многу интелигентно, паметно и тивко. Има денови кога сè го предизвикува, но како и секогаш – успеваме да ги надминеме. Аутизмот не го прави неспособен за сè, но опкружувањето е неспособно да го разбере. Неговиот мозок функционира многу потешко и побрзо од просечниот мозок – Холи Л.

– Иако мојата ќерка не зборува, таа е најсочувствителната девојка што ја познавам. Ако луѓето ѝ дадат малку време – таа би комуницирала на начини што ќе ве воодушеват. Таа е неверојатно паметна, забавна и нежна – Боб Ц.

– Моето дете гледа на светот со секоја клетка од своето тело. Ги чувствува сите емоции одеднаш. Бидете трпеливи бидејќи неговото срце е толку искрено – Анабел Б.

Извор