Американскиот експерт за родителство Ејми Мекреди споделува кои се најчестите грешки што родителите ги прават со своите деца.
Како што објаснува таа, разбирливо е дека родителите нема секогаш да ги прават правилните работи кога се во прашање нивните деца и сосема е во ред понекогаш да згрешат.
– Како експерт за позитивно родителство и едукатор, ги составив петте најголеми грешки што родителите несвесно ги прават. Ова се добронамерни, но не многу корисни стратегии за родителство кои отсекогаш сум се трудела да ги избегнам во мојот дом, а ги советувам и другите родители да го пробаат истото. Се разбира, никој не е совршен, но ако можете да ги намалите на минимум, тоа ќе биде многу корисно на долг рок – вели таа.
Никогаш не им плаќам на децата за извршување на обврските низ домот
– Често слушам од родителите дека на своето дете му даваат џепарлак ако си ја исчисти собата или ги измие садовите. Апсолутно не се согласувам со оваа воспитна тактика и никогаш не ја користам со моите деца. Зошто? Децата треба да се научат дека домашната работа е составен дел од секој ден, а не нешто што треба посебно да се наградува – објаснува Мекреди и додава дека на овој начин парите стануваат надворешен мотиватор за децата, што не е добро ако навистина сакаме да развиеме внатрешна мотивација кај децата која првенствено произлегува од добрата волја, одговорноста и истрајноста.
Никогаш не ги казнувам
Една од најчестите родителски тактики е казнување на децата, но овој експерт нагласува дека воопшто не ја поддржува и смета дека нема резултати.
– Ова е популарна техника за родителство, но тоа не значи дека е ефикасна. Имено, целта на секоја дисциплинска техника треба да биде тренирање за подобро однесување со зачувување на силна емоционална поврзаност меѓу родителот и детето, а казнувањето не го овозможува тоа – објаснува таа.
Никогаш не ги етикетирам децата
Многу родители, обично несвесно, ги етикетираат своите деца, особено ако имаат повеќе деца. Мекреди смета дека ова е една од најголемите родителски грешки која може да има сериозни последици во подоцнежната возраст на детето.
– Едни ги сметаме за паметни, други за добри помагачи, додека третите само предизвикуваат проблеми. Верувале или не, но дури и позитивните етикети ги обесхрабруваат вашите деца бидејќи поставуваат споредба и натпревар со врсниците, што никогаш не дава добри резултати – објаснува експертот.
Никогаш не ги терам да изедат сѐ што им е во чинијата ако сакаат десерт
Никогаш не присилувајте ги децата да изедат сѐ од чинијата пред да јадат десерт.
– Во слатките треба да се ужива како и во секоја друга храна – доброволно. Тоа е затоа што секој тип на присилно хранење, без разлика дали преку уцена, казнување или кој било друг метод, е основа за борба за моќ за време на оброк, која никому не му користи. Го одзема фокусот од поттикнување здрави навики во исхраната и наместо тоа, создава тензија помеѓу родителот и детето. Со тоа десертот се претставува како награда за јадење „помалку пожелна“ храна, како што е зеленчукот – што не е баш начинот на размислување со кој сакаме нашите деца да растат – објаснува Мекреди.
Никогаш физички не ги казнувам
Многу родители прибегнуваат кон удирање како последно средство или за да им одржат важна лекција на нивните деца, но истражувањата покажаа дека дури и најдобронамерното удирање може да го подигне нивото на агресија, да го поттикне лажењето за да избегне казна и да го загрози односот меѓу родителот и детето. Со истото се согласува и Мекреди, која нагласува дека никогаш физички не ги казнува своите деца.
– Сè може да се реши со разговор, децата се многу едноставни и сакаат да учат од нас. Токму преку нашиот пример тие учат како да се однесуваат и какво однесување е дозволено, а што строго забрането. Родителите треба да научат за самоконтролата и да се држат до неа, без разлика колку понекогаш може да биде предизвикувачко, заморно и тешко родителството – додава таа.
912