Тие не слушаат, трчаат и паѓаат, фрлаат работи низ дома, истураат, уништуваат, постојано плачат, се фрлаат во тантруми среде улица или продавница, ни го „растураат“ животот… во сиот тој хаос и напор ние, родителите, не можеме да не ги обожаваме и сакаме нашите деца. Но, тешко е тоа да им го покажеме во таква атмосфера…

Доаѓаат фазите кога сме нервозни, уморни и немаме сила помеѓу опоменувањето, спасувањето, вревата и хаосот, да создадеме природни моменти кога ќе им кажеме дека ги сакаме. Едноставно не стигнуваме или забораваме. А потоа одеднаш ќе се сетиме и нè мачи совеста. Дали издвојувам премалку време за своето дете? Дали денес бев престрога? Дали премногу викав? Викањето и конфликтите се нормална и секојдневна работа во едно семејство со деца. Но, важно е притоа на некој начин на децата да им се пренесе пораката за љубов и да им дадеме чувство на заштита, сигурност и доверба. Тоа ќе ги направи посилни, па и покрај конфликтите, тие ќе изградат чувство на самодоверба.

Како да им пренесете порака за љубовта?

Додека некое дете повеќе сака да се гали и да ужива во вашата прегратка, друго дете може помалку да го цени таквото искажување на љубов и по кратка прегратка ќе замине да игра. Тоа не треба да ве обесхрабрува. Децата се разликуваат и тоа треба да го прифатите. Вие сте во состојба да процените што му треба на вашето дете или деца. Обидете се да им го овозможите тоа. Ви пренесуваме уште неколку совети како да си го олесните тоа:

Ритуали – Тие бараат вложување малку време, но на детето му овозможуваат чувство на сигурност. Заедничкиот појадок или приказната за добра ноќ, некоја ваша измислена активност, реченица или игра што секогаш ја повторувате во одредено време или во некои ситуации. И земете предвид дека ритуалите треба да се повторуваат, така што испланирајте нешто што секогаш ќе биде изводливо.

Галење – Децата ја сакаат вашата телесна близина, допирот и чувството на заштита. Но, некогаш не успеваме или забораваме да ги прегрнеме. Затоа, одредете си време за галење. Станете порано и галете се пред да почнете со утринските активности. Немојте да инсистирате на долго галење ако тоа не му одговара на детето.

Внимание – Секако дека не може секогаш да бидете во средиштето на случувањата, но детето сака некој да го сослуша. Оброците на масата се одлична можност. Разговарајте за тоа што секој го доживеал во текот на денот. Што го израдувало? Сигурно ќе се изненадите од тоа што ќе го дознаете.

Луди изненадувања – Сите сакаме пријатни изненадувања. Затоа, одвреме-навреме променете го секојдневието со излет, пикник во паркот наместо ручек дома, изгаснете го телевизорот и играјте друштвена игра.

„Те сакам“ – Овие зборови ги прават децата среќни. Обрнете внимание на децата редовно да им кажувате нешто убаво и „те сакам“. „Денес одлично си ги средил/а играчките“. Ако сте го заборавиле тоа или не сте во можност, напишете порака и ставете му ја на детето под перница или во џебот.

Бидете добри кон себе – Ако се запоставите себеси и своите потреби, не чудете се дека сте целосно исцрпени и лошо расположени. Децата имаат одлични радари и го чувствуваат вашето незадоволство. Редовно одвојте време и направете нешто исклучиво за себе. Семејството и пријателите сигурно можат да помогнат.

Во ситуации кога ќе ви дојде преку глава

Кога ќе ви дојде преку глава, секогаш потсетете се дека се лутите на постапките што ги направило детето, а не на самото дете. Тоа ќе ви го олесни товарот на лутина. Но, не треба тоа да го правите преку физичка или вербална повреда. Јасно кажете: „Лут/а ти сум бидејќи не ме послуша“, „Ме лути бидејќи не ги среди играчките“. Ако не можете да комуницирате на овој начин, тргнете го накратко од просторијата додека не се смирите.

Мајките често се борат со големите очекувања од себеси. Чувството дека мора да бидат одлични во секоја област како мајка, сопруга, работник е тежок товар. Бидејќи на децата не им е потребна таква совршена мајка, туку им е потребна нивната, автентична мајка со сите свои недостатоци и доблести. Размислете за тоа дека можеби си поставувате превисоки цели и знајте дека нема совршени родители. Со вашите несовршености му давате можност на детето да биде несовршено и самоуверено.

Ако имате чувство дека вашата љубов долго време не доаѓа до израз, побарајте стручна помош. Понекогаш, отворениот разговор со некој што ве разбира може да ви помогне.



912

X