Децата често имаат абдоминална болка и во повеќето случаи причините се безопасни и не бараат понатамошен третман. Меѓутоа, во некои случаи потребно е да се реагира на болката и да се оди на лекар бидејќи некои состојби се доста сериозни.

Абдоминалната болка кај децата се означува како чувство на непријатност и болка во пределот на стомакот и може да се наоѓа помеѓу градите и препоните. Болките можат да бидат предизвикани од физички нарушувања, но и од некои психолошки состојби кои исто така бараат дијагноза и третман. Со оглед на сите органи и органски системи кои се наоѓаат во стомакот, не е невообичаено тоа што токму овој дел од телото е место на различни болки.

Помалите деца често не знаат точно да ја опишат болката што ја чувствуваат или да го покажат местото каде што всушност ги боли, па затоа е важно родителите да ја препознаат причината за болката, но и да разберат кога е време да побараат лекарска помош. Во повеќето случаи болката не е предизвикана од сериозен медицински проблем, но понекогаш може да биде знак за нешто сериозно.

Ако детето сè уште не знае да зборува, лесно можете да забележите дали го боли стомакот по неговото однесување. Во овој случај, вашето малечко ќе биде понервозно од вообичаено, ќе ги крева нозете кон стомакот, слабо ќе јаде или пак ќе одбива храна. Може да биде вознемирено, да плаче неутешно или да биде безволно, што е исто така еден од почестите показатели дека детето е болно.

Кога да побарате медицинска помош?

Доколку болката не престане во рок од 24 часа или ако видите дека детето е во исклучително лоша состојба, тоа може да биде посериозна состојба, како што се воспаление на слепото црево, камења во жолчка, чир на желудникот, воспалителна болест на цревата, торзија на тестисите или инфекции на уринарниот тракт. Секоја од овие состојби бара медицинска интервенција бидејќи, доколку се игнорира подолго време, може да настанат сериозни последици.

Извор