Не е лесно да се воспита добро дете. Не е лесно да се одгледува дете кое е внимателно, учтиво, добро, кое ги почитува другите, вклучително и родителите. Сигурно сакате вашите деца да ве почитуваат – и сега кога се мали и еден ден кога ќе пораснат. Не се работи за некои принципи, туку тоа е нешто што го заслужуваат родителите.

Еве кои основни квалитети треба да ги има детето што ќе придонесат да ги почитува своите родители.

Емпатија

Кога ги учиме децата да ги разбираат и споделуваат чувствата на другите, ние ги учиме на емпатија. Охрабрете го вашето дете да размисли како неговите постапки можат да влијаат врз вас, неговите родители. Исто така, поттикнете го детето да се однесува со другите онака како што сака другите да се однесуваат со него.

Комуникациски вештини

Отворената комуникација е клучна. Научете ги децата да ги изразуваат своите мисли и чувства со почит и активно да ги слушаат своите родители. На овој начин се гради доверба и разбирање во семејството.

Благодарност

Всадете во детето доблест за благодарност, охрабрувајќи го да ги цени сите напори и жртви направени од родителите. Дури и наједноставните зборови на благодарност, како „те молам“ и „благодарам“, прават разлика.

Одговорност

Научете го детето колку е важно да преземе одговорност за своите постапки. Кога ќе ги разберат последиците од нивното однесување, децата имаат поголема веројатност да искажат почит кон нивните родители и кон другите.

Граници и правила

Поставете јасни и правични граници. Децата што растат со конзистентни правила и очекувања ја разбираат важноста од почитувањето на авторитетите. Разговарајте со вашето дете за правилата и објаснете зошто постојат.

Трпение

Охрабрете ги децата да се научат на трпение, така што ќе им дозволите да го чекаат својот ред, да слушаат внимателно и да разберат дека не се случува сè веднаш. Со трпение, тие ќе научат да ги почитуваат другите во интеракциите, а тоа исто така ќе им помогне да се борат против фрустрациите.

Љубезност

Поттикнете го детето да покаже љубезност кон другите, вклучително и кон вас, родителите. Дури и малите гестови, како што се помагањето во домаќинството или покажувањето благодарност, придонесуваат за позитивен став и почит во семејството.

Решавање конфликти

Научете го вашето дете на конструктивни начини за решавање конфликти. Ова вклучува смирено дискутирање за различни прашања, наоѓање компромиси и извинување кога е потребно. Способноста да се реши конфликт со почит – е вредна особина.

Независност

Можете да го поттикнете развојот на независноста кај децата така што ќе им доверите одговорности соодветни на возраста. Кога децата ќе научат сами да се справуваат со своите задачи, тие развиваат чувство на компетентност и се повеќе подготвени да го почитуваат родителското водство.

Усвојување позитивни модели

Најважно е да бидете добар пример за децата. Децата често ги рефлектираат чувствата и однесувањето на нивните родители. Кога покажувате почит, љубезност и емпатија во вашите интеракции со другите, тоа поставува силен пример за вашите деца.

Автор: Луна Николиќ

Извор