Ако сакате да дознаете како ве доживува вашето дете, дајте му да нацрта куќа, која всушност го симболизира односот на детето кон мајката. Сонцето е таткото, дрвото е самото дете, пишува Александра Цвјетиќ за zelenaucionica.

Пуштете ги децата да цртаат, на тој начин ги изразуваат своите психички состојби, стравови, радости, желби… Најлесно ќе навлезете во главата и срцето на вашето дете ако му дадете боици и хартија – детето не ги црта работите како што ги гледа, туку како што ги доживува.

Кога детето црта куќа со силни бои, со сите основни елементи: покрив, прозорци, врати, знајте дека тоа всушност прикажало како се чувствува во своето семејство, а се чувствува сигурно, сакано и среќно. Куќата со темни бои, без прозорци, на пример, кажува дека детето се плаши од нешто, дека нема близок однос со мајката и дека би требало да се запрашате дали во вашата куќа владеат хармонијата и љубовта, или нетрпеливоста, брачните кавги, љубомора помеѓу децата…

Кога таткото сака да дознае како го доживува сопственото дете, треба да го замоли да нацрта сонце. Големо и жолто, значи дека детето ве доживува како важен член на семејството, заштитник кој во неговиот живот внесува светлина и топлина. Мало сонце, сокриено зад облаците, планините, дрвјата… значи дека му недостигате и дека е време да му посветите повеќе внимание. На левата страна на цртежот секогаш се лицата што му се најблиски на детето, а оние што ги нема на семејниот цртеж не се несакани, туку ним детето им е луто и љубоморно.

Ако детето на цртежот е босоного, тоа значи дека е несигурно, а премногу исенчен цртеж цртаат децата што се нервозни. Многу е важно и како детето црта дрво. Кога дрвото е на централно место на листот, значи дека детето се развива природно, во личност со изразена свест за себе. Разгрането дрво, со зелени лисја и плодови, укажува на детето кое е сигурно во себе и своето семејство. Лисја што паѓаат е знак дека на детето му недостигаат родителите.

Чудовиштата значат дека децата од нешто се плашат, како и тенките потези со боицата. Агресивното дете црта со енергични потези, често и ја кине хартијата. Премногу детали црта детето што има прилично реален поглед на светот.

Меки, подебели линии користи дете што има способност за фантазирање, додека краеви и агли црта темпераменто дете.

Без разлика на тоа колку се важни цртежите, оставете го детето само да црта. Дури кога ќе заврши, пријдете му и погледнете што направил малиот сликар и задолжително пофалете го. Направете домашна изложба, повикајте ги другите членови на семејството, уживајте во „раната работа“.