Ако постои една вештина што треба да го научите детето, тоа е оваа
Постојат многу начини да му помогнете на детето во учењето и развојот, но еден од водечките психолози вели дека постои едноставен аспект на кој вреди да се обрне дополнително внимание за да може детето да стекне основни вештини.
Ден О’Харе, основач на онлајн заедницата на образовни психолози, за Си-ен-би-си вели дека експертите зборуваат многу за важноста на играта за учењето и развој на детето.
– Играта често се гледа како средство за да се покажат социјалните вештини на детето, но оваа активност е вредна дури и во неструктурирана форма – вели тој.
Неструктурираната игра наменета за детето или водена од детето е од суштинско значење бидејќи му овозможува да ја развие имагинацијата.
– Често ми се чини дека луѓето мислат дека правилната игра е единственото нешто каде што децата играат со други деца и соработуваат, но потребни се многу вештини за да се стигне до таа фаза. Всушност, нормално е малите деца да играат сами или покрај друго дете, но не нужно со него – објаснува О’Харе.
Тој посочува дека независната игра му помага на детето да развие моторни вештини, како и вештини за преговарање и управување со конфликти. О’Хaрe се повикува на студија објавена во 2019 година од Институтот за образование на Универзитетот во Лондон, која покажала дека учениците на возраст од 5 до 7 години имале 45 минути помалку одмор од децата во 1995 година. Истражувањето заклучило дека скратувањето на училишниот одмор во Англија може да биде штетно за развојот на децата.
Важноста на досадата
О’Харе, исто така, предупредува дека родителите не треба да размислуваат како да го пополнат слободното време на своето дете со активности.
– Слободното време, времето каде што има простор за досада, всушност е многу важно за учењето како да се забавувате. Ве охрабрува да бидете креативни, да решавате проблеми – додава тој.
Истражувањата ја поврзуваат досадата со зголемена креативност. На пример, една студија објавена во 2013 година од академици на Универзитетот во Централ Ланкашир посочила дека прифаќањето досадна задача може да му помогне на некого да изнајде покреативно решение за проблемот, бидејќи неговите мисли може да залутаат.
– Не сум против децата да се занимаваат со воннаставни активности, но саморегулацијата може да биде корисна за развој на одредени вештини – заклучува тој.
