Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Моето дете е второ одделение. Во прво одделение супер се снајде и беше омилен меѓу децата и наставничката, супер соработуваше и се адаптира. Но сега, во второ одделение има друга наставничка. Првите денови откако се запознаа таа ги оставаше по неколку часа и со други наставнички бидејќи била повикувана на состаноци. Оттогаш, син ми секој ден оди со плачење и ако не ја види на влез новата учителка, не сака да влезе во училиште. Секој ден го има истиот страв дали таа ќе биде цел ден со нив или ќе ги остави неколку часа со други учителки. Постојано разговараме дека таа е тука, но дека може да се случи да излезе накратко, дека не треба да се грижи бидејќи ќе се врати, но залудно. Секој ден се плаши да не ги остави.

ОДГОВОР: Во оваа рана училишна возраст децата не случајно имаат еден наставник по сите предмети со цел да се воспостави воедначен пристап во предавањето и учењето, со што се обезбедува чувство на сигурност и безбедноста кај децата од оваа возраст.

Поради тоа, менувањето на наставниците значи и менување на пристапот кон воспитанието и методите на учење, што предизвикува стрес и напнатост. Реакцијата на вашето дете е од психо-емоционална природа и се должи токму на тоа нарушено чувство на сигурност и безбедност. Оттука, решението за ваквата состојба на детето мора да го побарате во училишната закрила, во разговорите со учителката и стручната служба, кои би требало да обезбедат и групна работилница на оваа тема која ќе придонесе за групна поддршка и враќање на чувството на сигурност во училницата.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.