Многу експерти се согласуваат дека цртањето има позитивен ефект врз развојот на децата, моторичките вештини, имагинацијата, размислувањето и слично. Но, што гледаме ние како возрасни во тие цртежи?

Кога детето му покажува цртеж на родителот, често велиме „колку убаво“ и продолжуваме понатаму. Но, психолозите веруваат дека може да има важни пораки во тој цртеж што се однесуваат на вашето дете, како се чувствува, а преку цртежот можете и да се поврзете со него на подлабоко ниво.

Ако детето се чувствува удобно дома, ќе се нацрта со семејството, обично во центарот, помеѓу мама и тато или до братчето или сестричето.

Неопходно е да се обрне внимание на изразите на лицето што ги покажува младиот уметник – тажните, лутите или среќните лица исто така можат да кажат многу за атмосферата во домот и за тоа како се чувствува детето во него. Децата главно почнуваат да цртаат правејќи различни линии и форми, но до петтата година обично веќе се способни да цртаат препознатливи фигури, најчесто човечки тела или лица, цвеќиња, куќи, животни итн.

До седумгодишна возраст има скок во развојот на способностите за цртање. На цртежите се појавуваат доста детали, кај луѓето децата цртаат облека, а сликите од животни стануваат подетални. Децата не само што го цртаат она што ги опкружува, туку го покажуваат и своето знаење во цртежите, како и она што се крие во светот на нивната имагинација.

Ако не разбирате што е прикажано на цртежот на детето, задолжително прашајте го. Децата обично сакаат да зборуваат за тоа што го нацртале и да се впуштаат во долги објаснувања, кои само ја поттикнуваат нивната имагинација и уметнички склоности, па така ја поттикнувате меѓусебната комуникација, му давате до знаење на детето дека се грижите за тоа што му се допаѓа, на што мисли и слично.

На овој начин ќе научите многу нови работи: и она што е во главата на детето и она што го опкружува.

Кои цртежи можат да предизвикаат загриженост и укажуваат на тоа дека треба да закажете состанок со психолог?

1. Ако на сликите на детето постојано се појавуваат страшни чудовишта, пожар, експлозии, луѓе со зли и страшни изрази и други „мрачни нешта“.
2. Ако детето секогаш се покажува како многу мало во споредба со сите други работи нацртани на сликите.
3. Ако детето постојано користи „агресивни“ бои во своите цртежи, како црна или црвена.
4. Обрнете внимание на тоа како детето ги црта човечките фигури. Ако екстремитетите не се секогаш таму каде што треба, ова може да биде знак дека е важно да разговарате со психолог.

Сепак, не треба да донесувате избрзани заклучоци, туку прашајте го детето што нацртало. Можеби некои од работите што тоа ги црта и ви изгледаат страшно се всушност симболи од приказна или цртан филм.

Важно е да разговарате со него за тоа како се чувствува, која содржина е добра, а која не е. Доколку се повторуваат страшни и непријатни мотиви на цртежите, неопходна е консултација со психолог.

Извор