Секој родител, без разлика дали како ученик имал добри или лоши односи со училиштето, сака неговото дете да биде одличен ученик. Колку и да ни се чини дека знаењето не е во мода, вистината е дека пообразованите барем имаат можност за поголем избор. Во овие неколку редови сакам да им дадам поддршка на родителите чии деца тргнуваат во прво одделение. Дека нивните училишни денови се задоволство, а не тежок товар.

Сега сите деца посетуваат предучилишна програма. Децата што ја посетуваат таа програма имаат мала предност кога станува збор за првите училишни денови. Наставниците кои го преземаат првото одделение веќе на самиот почеток собираат информации за тоа каде децата ја посетувале предучилишната програма, па се трудат да им помогнат на децата што доаѓаат од градинка да го пронајдат својот пат. Така, немате причина да се грижите кога станува збор за снаоѓање на вашето дете во новиот простор.

Не срамете се да го запознаете наставникот со важни информации од вашиот семеен живот. Треба да го запознаете наставникот, на пример, ако сте разведени, ако некој починал, за наставникот да може да ја приспособи својата работа на тие околности. Обврска на наставникот е да ги извести за тоа другите наставници што го учат детето. Сите имаме заедничка задача да се грижиме за емоциите на учениците и да не ги повредуваме.

Обидете се да го направите првиот училиштен ден вистинска мала прослава во вашата куќа. Обележете го тој ден, во согласност со вашите можности, за вашето дете да разбере дека тоа е посебен и важен ден во неговиот живот, без разлика на сите тешкотии што ги носи училишниот живот.

Избегнувајте коментари за наставникот, ако можеби не ви се допаѓа на прв поглед, во присуство на детето. Не изразувајте го своето разочарување затоа што детето може да го забележи. И верувале или не, многумина што не го избрале наставникот за своето дете подоцна се позадоволни отколку оние што го избрале. Не сфаќајте ги здраво за готово сите приказни што ќе ги слушнете. За некого една личност е престрога, а за други – праведна и умерена. На пример, една мајка ми кажа дека кога го запишувала своето дете на училиште, била многу конкретна во желбата наставникот воопшто да не го учи нејзиното дете и по десет дена се разочарала што тоа не е нејзин избор. Ако сте многу незадоволни и по одредено време, откако ќе размислите добро, имате опција да смените училиште и наставници, и тоа е можеби попаметно отколку да го пренесувате вашето незадоволство во следните четири години и да му ги отежнете училишните денови на вашето дете.

Еве како да го подготвите вашето дете за на училиште:

Научете го да брои предмети во куќата, коцките од кои гради кула, виљушките и лажиците на масата, чиниите, камчињата од плажа, цвеќињата во вазната… Одземајте еден по еден и ќе научи да брои наназад многу брзо.

Не е неопходно децата да знаат да читаат и да пишуваат, доволно е што го совладале концептот на простор меѓу две линии за да можат правилно да цртаат коси и вертикални линии, бранови. Вежбајте на плех попрскан со брашно или во песок. Оставете ги децата прво да пишуваат прави и криви линии, бранови со прстите. Само кога децата целосно ќе го совладаат тоа, преминете на хартија и молив. Повеќето деца го усовршуваат ова во градинка, но ако не, тоа ќе го надоместите со трпелива работа. Детето што ја совладало оваа вештина ќе пишува букви многу убаво и лесно.

Доволно е децата да ги препознаат напишаните букви. Играјте ја играта „На буква, на буква“.

Поставете им на децата прашања за кои се претпоставува дека ги знаат одговорите. Вака децата вежбаат да се изразуваат. Доброто изразување е клуч за успехот. Замолете ги да ви кажат за нешто што им се случило, да опишат нешто што го гледаат, помогнете им ако имаат тешкотии со тоа. Со вежбање, тие ќе бидат подобри и подобри. Ќе се изненадите кога на училиште самостојно и многу успешно ќе го напишат својот прв состав.

Она што е потребно е детето да знае што е дозволено, а што не е дозволено однесување, т.е. загрозување на безбедноста на другите. Не дозволувајте детето да управува со вас бидејќи на училиште нема да може да се снајде со оној што го учи, како и со децата во класот, а такво нешто ќе му биде голема тешкотија.

Не претерувајте во сето ова и правете го спонтано и ненаметливо

Ако сте успеале во сето тоа, успехот што вашето дете редовно ќе го постигнува од самиот почеток ќе му биде ветер во грб. И кога детето ќе тргне на училиште, редовно проверувајте ги неговите тетратки, покажете почит за неговите напори. Создајте навики кај детето да вежба читање одреден временски период секој ден. Со нетрпение го очекуваме секој заеднички успех, кој секако нема да се пропушти!

Извор