Забележавме дека кога си игра со своите кукли, зборува исклучиво на руски јазик. На почеток мислевме дека тоа се само меморирани зборови кои во реченица немаат некакво значење или смисла. Сите знаеме дека на таа возраст децата се како сунѓери, па и воопшто не ни беше чудно што запамтила неколку фрази. Но, дијалозите помеѓу играчките секој ден траеја сè подолго, како да гледаш театарска претстава на руски јазик, раскажува мајката Ана

На четиригодишна возраст, додека Катја била на одмор со мама и тато, на плажа слушала дијалози меѓу Руси. Додека тие зборувале, таа почнала симултано да им преведува на своите родители што тие зборуваат, со што буквално ги шокирала. Oва девојче сега е прваче и на родителите им преведува и дијалози од најразлични детски филмови.
Никој во семејството на шестгодишната Катја Котевска не зборува руски, ниту, пак, има каква било врска со Русија. Таа сама пројавила интерес за јазикот гледајќи цртани филмови на интернет.

На три години со куклите „си зборувале“ на руски

– Кога Катја имаше околу три години, случајно забележавме дека додека си играше, зборуваше на нешто што звучеше како руски јазик и логично ни беше интересот да го споиме со руските цртани филмови, особено со „Маша и Медо“, кој тогаш беше многу популарен – се присетува Mирче Котевски, таткото на Катја.

Кога веќе ѝ помина интересот за Маша и Медо, почнала да ги гледа Барбоскини, руски цртан филм за семејство на кучиња.
– Забележавме дека кога си игра со своите кукли, користи исклучиво руски јазик. На почеток мислевме дека тоа се само меморирани зборови кои во реченица немаат некакво значење или смисла. Сите знаеме дека на таа возраст децата се како сунѓери, па и воопшто не ни беше чудно што запамтила неколку фрази. Но, дијалозите помеѓу играчките секој ден траеја сè подолго. Сето тоа беше како да гледаш театарска претстава на руски јазик. Сосема случајно еден пријател што го зборува јазикот ја праша неколку работи на руски јазик, а Катја најнормално без никаков напор му одговараше – вели Мирче.

Сакаме да ја запишеме на курс, но нема каде

Членовите на семејството на Катја не го знаат рускиот јазик, ниту пак имаат некаква врска со Русија. Тоа било причина за родителите да се распрашуваат каде низ Скопје има детски курс по руски јазик.

-Не можевме да најдеме ништо слично на детска програма за изучување на овој странски јазик. Изминатото лето се обидовме и со Руското пријателско друштво, но и таму, за жал, не се формира детска група. Во меѓувреме, како првоодделенче, секојдневно околу половина час од слободното времето го користи за гледање семејни руски јутјуб-канали преку кои го збогатува фондот на научени зборови. Освен што очигледно е дека се снаоѓа во секојдневна комуникација и тоа без никакво менторство, сега веќе знае да рецитира и песнички и да раскажува приказни – ни рече Ана, мајката на Катја.

Катја со најдобрите другарки Ема и Ника

Сака да се дружи, да помага во кујната и да снима влогови

Катја е дете кое не е многу различно од своите врсници, но како и секое дете, таа е посебна.
– Зависна е од луѓе и дружење, сака да танцува и сама да смислува друштвени игри, да биде „помлад асистент“ во кујната, да прави „проекти“ со домашни материјали, а секако длабоко е „навлезена“ и во „видеопродукцијата“ – снима тематски блогови за својот канал (за кој знае дека ќе ѝ го отвориме на Јутјуб кога ќе наполни 7 години). Има и други моментални „хитовски интереси“ на кои им пристапува со должна посветеност и деноноќен интерес, како и мудри дилеми oд типот: „Како тоа банкоматот знае колку плата зeмаш?“ и слично. Расте како единче и особено ни е важно да знае дека ние сме тим составен од тројца, кој си верува, поддржува и помага – појаснува мајката Ана.

Таа и нејзиниот сопруг Мирче ја воспитуваат ќеркичката да биде слободна и одговорна, во најширока смисла на зборот.
– Ја учиме да не се плаши и да верува во себе. Да споделува со другите и да ги почитува различностите. Да биде љубопитна и никогаш да не престане да прашува, но истовремено и да ја знае важноста на слушањето. Нешто што и ние како возрасни сè уште го учиме. Најважно ни е да знае дека секогаш, при секоја нејзина одлука, ќе бидеме чекор зад неа, но патот ќе ` го оставаме широко отворен и слободен. И, секако, заеднички се учиме на „големите“ работи, како до почист воздух, како до здрав оброк со само три намирници, како да им помогнеме на ониe што имаат помалку од нас. Ние како родители непретенциозно се трудиме и верувам дека навистина љубовта доаѓа природно, а позитивното родителство се учи – вели Ана.

Таа и Мирче се трудат да го следат интересот на Катја без форсирање.

– Оставаме самата да истражува и да каже со што сака да се занимава. Еден ден тоа е балет, друг ден е куглање. Навистина ни е важно да сфати дека со што ѝ да се занимава, ќе ја има нашата поддршка. Ја охрабруваме да се обидува, без никакви очекувања и ограничувања, да биде отворена за нови нешта, но и да разбере дека се очекува да биде одговорна и исполнителна – потенцира мајката.

Сакам да бидам учителка, докторка, сликарка…

Катја е прваче во Основното училиште „Александар Македонски“ во Скопје. Вели дека ги обожава своите две наставнички Елена и Наташа.
– Освен што сакам да зборувам руски јазик, сакам и да снимам кратки видеа на тој јазик и да раскажувам каде сум патувала со авион, како знам да правам мафини, како не треба да се фрла ѓубре на улица и друго. Кога ќе пораснам, сакам да бидам учителка, а може и докторка за деца. А сакам и да цртам, па може и сликарка. А може и се заедно – ни рече Катја.
Најдобрите нејзини другарки од училиште се Ника и Ема. Заедно си играат и по часовите, си помагаат и си измислуваат нивни игри.
– Се дружам многу и со Агнес. Кога не се гледаме, сами се снимаме и си пуштаме видеопораки на мобилните телефони на мама или тато. Така си разговараме. Многу е интересно – вели девојчето.