Стомачните вируси и бактерии се честа појава кај децата. Кога ќе се појави дијареја (стомачни тегоби, течна столица), најчесто придружена и со гадење или повраќање, зачувувањето на хидратацијата и правилната исхрана се важни за брзо закрепнување.

Зошто кексот, лебот и тестенините ја влошуваат состојбата?

Кога микроорганизмите ќе ја оштетат слузокожата на цревата, се губат ензимите за разградување на шеќерите и јаглехидратите.

• Јаглехидратите го зголемуваат губењето на водата: Храната богата со јаглехидрати (слатки, кекси, леб, тестенини) повлекува дополнителна вода од ѕидот на цревата во цревната празнина.
• Резултат: Столицата станува уште потечна и почеста.

Основно правило: Избегнувајте шеќери, тесто, сокови и газирани пијалаци сè додека цревната слузокожа не се обнови.

Кои се главните чекори за помош?

1. Надомест на течности (рехидратација) – најважниот чекор!

При течна столица, детето не губи само вода, туку и важни минерали (електролити).

• Што да давате: Раствори за орална рехидратација од аптека, разладен чај од нане или негазирана минерална вода.
• Како да давате? Често и по малку. На секои 5-10 минути давајте по 1-2 лажички (или 20–30 ml за поголеми деца).

За бебиња што цицаат: Доењето НЕ СЕ прекинува! Мајчиното млеко помага во подобрување и брзо закрепнување.

2. Диетална исхрана

• Првите 1-2 дена: Варен ориз, варен морков и малку варен компир со малку сол.
• Постепено преминување: Додајте варено бело пилешко месо или телешко во супа.
• Не форсирајте: Губењето на апетитот е нормално. Најважно е детето да пие течности.

3. Улогата на пробиотиците

Пробиотиците внесуваат корисни бактерии кои ја обновуваат цревната флора, ги уништуваат штетните микроорганизми и помагаат слузокожата побрзо да се заздрави.

Кога веднаш да побарате лекар?

• Детето повраќа и не може да задржи течности.
• Забележувате примеси на крв во столицата.
• Детето е изморено, безволно, поспано или има знаци на дехидратација.
• Станува збор за бебе во првите месеци од животот.

Важно за антибиотиците: Никогаш не давајте антибиотици на своја рака! Најголемиот број стомачни инфекции се вирусни и антибиотиците не само што не помагаат, туку можат дополнително да ја влошат дијарејата.

Извор