– Имајте многу трпение, успехот не доаѓа преку ноќ; ако сте под стрес, размислете да го одложите почетокот.

– Подгответе голем број гаќички и резервна облека (во првите денови може да се случат и до десет незгоди).

– Носете нокшир кога излегувате надвор, подгответе пешкири за во автомобилот или кога одите на гости.

– Кога ќе почнете, не откажувајте се брзо за да не го збуните детето.

– Бидете позитивни и пофалете го секој успех, а неуспесите прифатете ги како дел од учењето.

– Немојте да правите голема фама околу одењето во тоалет. Тоа е само една мала фаза во осамостојувањето.

– Прифатете ја желбата детето само да се грижи за своите потреби.

– Користете едноставни зборови и упатства кога објаснувате што очекувате.

– Имајте реални очекувања и дајте му време на детето да разбере кои се барањата од него.

– Не очекувајте детето веднаш да ги отфрли дневната и ноќната пелена.

– Ноќната пелена отстранете ја кога ќе забележите дека неколку ноќи по ред е сува.

– Обезбедете поддршка од сите членови на семејството и усогласете се со градинката или личноста што го чува детето.

Акција – ова лето ги симнуваме пелените

– Купете нокшир (нека детето само го избере) или додаток за веце-школка.

– Соблечете му ги пелените и облечете му гаќички.

– Поставете го нокширот на место каде што детето секогаш може да го види.

– Одете со детето повеќепати во тоалет и објаснете му за што служи и како се користи.

– Кога ќе забележите дека детето има потреба, понудете му да седне на нокширот. Ако успее, наградете го.

– Ако детето се измочка во гаќичките, не викајте му, само мирно објаснете му дека сега треба да се пресоблече и дека следниот пат треба да го користи нокширот.

Во текот на учењето користете приказни со мали јунаци кои минуваат низ исти ситуации.

– Бидете трпеливи и упорни – за околу една недела до десет дена (ако детето е подготвено) ќе успее да ја контролира својата потреба.